Sjééle Waazel Gala
De Kieveloeëters èn kieveloeëterinne die ènweezich waare óp 3 dizzèmber, zalle dizzen daatum nòjt mèr vergééte. De Sjééle Waazel-aovent begoos nao de wétstréjt van ’t Nidderlants Élleftal. Ze speulde in dezèllefde ópstèlling mi nie gewèldich spèl, mèr han wal Ammirrieka verslaage óp ’t WK voetbal.
Wéj mooste WAL mi ’n èngepaaste ópstèlling beginne. Dirk Kouwenberg moos sich jammer genòch afmèlde vanweege ziekte. Mèr de kwallietéjt van ’n sèllèksie zit ‘m in de brétte van de sèllèksie. Want wa han we tòch ’n goejje vervanger! Dus mi ’n èngepaaste ópstèlling, mèr wal mi fantasties spèl woor ‘t ’n sjitterenden aovent.
Wa han wéj ’n suupper zaal. Vanaf de uurste menutj, vanaf de uurste buutte was ’t raak. ’t Èntoezjasme van de zaal sloech övver óp de artieste die dernao vólle bak ginge. Sjitterende verhaole kwaame langs. Ik gao ze hie:r nie vertélle, mèr diegeene die der nie béj waare hébbe ècht wa bezónders gemist…
Nao dizzen aovent mi de sjònfemiellie èn nòch inkele ‘hallefbuu:rs en hallefzeusters’ nòch wa naogebòrrelt béj óns tusj. Suupper gezèllich was tè. Um vééjf uurres smèèrges ging iedderieën nò husj. Um zis uurre hép ik Lisette nòch de vraoch gestéélt, èn ze zee inderdaat: “trèk òw mèr goe èn, tis kaaw butje…”
Diegeene die wal óp de Sjééle Waazel-aovent waare die snappen um… Ik bén gòn fietse,
Dan zéch ik sjééle waazel
Dè kan toch nie bestao
Mèr mi dees gèkke daach
Dan kie:k ik dòr nie nao
Dan zéch ik sjééle waazel
Nòw lusjter wa ik zéch
As ‘t sirriejeus wért
Dan bén ik zoeë ewéch
(tèkst utj SJELE WAZEL van VALS PLAT)
De filliesietaasies gòn mèr dur, nèt zòas ’t maake van sjòn hèrinneringe. Óp mòndiggenaovent 12 dizzèmber wéére we verrast dur de vriendinne van Lisètte mi urre partners. Ze han bedaacht um ’n kómpleet dienee mi veurgerècht èn toetje vur óns te maake. ’n Fantasties iedee èn wér enne gezèlliggen aovent die vóllechde. Dangk òllie wal. ’t Was fantasties! Èn èkskuus vur ’t laang waachte…
Dan wéér ik utjgenöddicht vur de kórsvie:ring van de KBO. ’t Is ’n goe gebruuk détte prins mi de veurzitter van de Kieveloeët ’n ‘acte de présance’ géft.
Ik mérrek dè ik zòveul meugelek wil ‘pakke’; Vréj kanne reegele óp ’t wèèrek. Sjitterent hoe zéj meedingke. Dangk òllie wal.
“Ónderweeges pròt ik òw wal béj.” zee veurzitter Rudy. Saame óp wéch nò den Binger. Zónder verwachtinge loeëp ik mee. Émmel dòr èngekómme zitte dòr óngevieër 200 aawere jóngere te geniette in de zaal. ’t Èntal verraste méj. Gòw nòch wa weurt aachterén gezit èn hòp, dè poodiejum óp. As minst jónge prins van de Kieveloeët òjt, vuulde ik méj drèk tusj. Dangk òllie wal vur dizze sjònne middich. ’t Was sjitterent.
’t Groeëte zit em inne reegel in ’t klénje. Óp 23 dizzèmber broochte we (’t Dreigestirn) ’n bezuu:k èn de rippetiesie van Goe Gehusseld. Óns is tèr òrre gekómme dè Saskia nò ’n laang zie:kbét wér kumt rippeteere. Um ur ’n steun in de ruch tie gééve, valle we téjdes de rippetiesie binne èn gééve we ur ’n bluumke. Ur doe:l is meedoe: èn de Bonte Aovend mi Goe Gehusseld óp ’t poodiejum. “Dòr gòn we vur, ik zie òw dan!”
As ik di alles èn ’t sjrie:ve ben, is ’t awtjaorsdach. ’t Bereecht is geestere binnegekómme dè awtprins Frans Strijbos van 1989 is dògegao. Èchte Kieveloeëter die wies sen dò aaltitj vérrich stóng vur de verénniging. Héj haa ók enne sjitterende spreuk: “Van de mèrrige tot de aovend, övveral vastelaovend!” Ók hép ik Frans lie:re kénne as enne èchte supporter in den titj dè ik in ’t uurste van Méél moocht voetballe. Utj èn tusj, aaltitj wasjie ènweezich. Èn de naobestaande veul stérrekte toegewènst.
Òwtoomaaties gòn min gedachtes nòr mèèrege (1 jannewarrie). Tis alwér vééjf jaor geléjje dè ónze pap stierref.
Koester ‘t vléjje, verheuch òw óppe toekómst,
mèr geniet nòw saame van dizze vastelaovend
Prins Erwin I