Prinsetrèffe Oranjerie Remeunt
Tis de wéék vur de vastelaovend. De mòndich èn dinzich hép ik gewoon gewérrekt èn óp atvies van ingkele aaw prinse die nòch binne de Kieveloeët aktief zin, hép ik vannaf de woenzich vréjgevraocht. Óppe dinziggenaovent sté ’t prinsetrèffe in de Oranjerie in Remeunt óp ’t prógramma. Allemòl prinse utje reegiejoo èn dòrbutje kómme hieróppers. Wéj gòn mi ’n klup van vieftien man richting dizze ‘verenparade’.
Émmel binne zien we mee de uurste bekéénde al: De aaw prinse van Panninge (APK-side) mi ‘de Breurkes’, die dizzen aovent ók ’n óptreeje maage verzèùrege. We loeëpe de zaal in èn atjuudant Mark mèlt óns nètjes èn. Prins Erwin den uurste èn prinsès Lisette. Di betieëkent dè as ze óns eumroe:pe dè wéj nò ’t poodiejum moette èn maage meedanse òf hòsse mi de artiest die óp dè moomènt èn ’t óptreejen is. We zin benééjt. We loeëpe witjer èn ik zie ingkele leeje van de vastelaovesverénniging utj Héjbloem. Ik kén der ’n èntal van èn dòr blief ik dan al ‘hange’. Dan óntmoet ik ’n awt-klasgenoote èn wért ’t al hél gòw hél gezèllich. Den tip um vannaf woenzich vréj te pakke, kan ik nòw al wardeere. Utjéjndelek vinge we ónze plèk in ’t midde van de zaal mi de bar óp loeëpafstant. Al gòwgenóch krie:ch ik óndersjéjjinge van ander verénniginge. Ók mi prinseplétjes vinge greetig aftrèk. Wies Sint Antunnis toe loeëpe ze mi min prinseplétjes. Dan wérter gevraocht òf ik wa wil dringke. Ik géf min muntje èn der gòjt iemmes van ’n ander verénniging ók vééjf muntjes èn ruupt: “doe méj ók mèr vééjf pils”. Ik hép em al ’n paar kérre èngekeeke èn méénj em te hèrkénne, mèr ik wit niet nie mèr wòrvan. Di is de meugelekhéjt um em dernò te vraoge. Veurdè ik de vraoch kan stélle, herkééntjie méj èn ruupt minne naam. Nòw wit ik ’t ók. Di zin de manne utj Néér. Mi ingkele die nòw in de rò van Néér zitte hébbe we ’n dartich jaor geléjje ’n paar vekansies in Renèsse durgebroocht. Hèrrinneringe wéére wér ópgehalt èn der wért wér veul gelache.
Dan wért minne naam èn die van Lisette eumgeroe:pe èn maage we óns nò ’t poodiejum begééve. Footoograaf Johan gé mee um ingkele footoos te knippe, mèr woor al gòwgenóch van ’t poodiejum gehalt. Mèr enne goejje footoograaf veengt dernao zin plèkske wér èn knipt ter wér vroolek óp lòs. Klasse Johan. Saame mi Lisette stao ik nòw mi ’n twénjtjichtal ander prinse óp ’t poodiejum. Dan kumt de artiest, ’n kléénj ménneke mi de pèt aachterstevurren óp. Ik kén dizze nie èn dè is mesjien mèr goe ók. Héj makt ’n sórt ‘ballerman’ meziek mèr dan mi vastelaovestèkst. Di is vur méj génne vastelaovesmeziek èn begééf me dan ók gòwgenóch wér óp de aachtergrónt. Dòr trèf ik nòch enne prins die mi dizze meziek nie veul hi, èn ónder ’t genòt van ’n pilske bekie:ke we ’t taffereel. Dan kie:k ik nò lings èn zie ik dè Lisette ur éjge fésje èn ’t baowe is mi ’n paar ópgesjoote joong. Ze danst ter flingk óp lòs. Nò dréj nummers maage we van ’t poodiejum af èn gòn we wér truch nòr óns plèkske in de zaal. Dòr vie:re wéj óns fésje wies slutjingstitj èn nò ’n footoo mi Big Benny kieëre wéj wér nò ’t Méélse. Enne sjitterenden aovent mèr ’t poodiejummoomènt han ze van méj maage övverslao. Òf bén ik ècht zònne aawe prins?
Hee hee hee hee hee hee, wie bénne géj?
Hee hee hee hee hee hee, wie bénne géj?
Hee hee hee hee hee hee, wie bénne géj?
Hee hee hee hee hee hee, wie bénne géj nòw?
Jao héj nòw, wie bénne géj nòw?
Jao héj nòw, wie bénne géj!
(Tèkst utj ‘Wie bénne géj’ van Vals Plat)
Koester ‘t vléjje, verheuch òw óppe toekómst,
mèr geniet nòw saame van dizze vastelaovend
Prins Erwin I