Utj ’t dagboek van de prins dél 2 (Méél, 11 jannewarrie)

Kieveloeëters en Kieveloeëterinne,

Wà ’n wéék, zòveul feliesietasies in de veùrem van karte, bloeme, èsèmèsjes, meeltjes, gasteboek, handrukke, óppe kòffie, noem mèr óp. Iederieën….bedankt.

Mòndig 3 jannewarrie de uurste ròdsvergaddering béj Kareltje Colé. Gezellig mèr ók seriejeus, wà ’n wèèrek vur die hérre van ’t kómmietee en de rò van éllef, ze hebbe ’t goe vur èlkaar. Vastelaovend duurt inderdaad langer dan 3 daag. Èn ’t éjnd van de vergaddering mi z’n àlle “Lééve de Kieveloeët” gezónge en nòg èfkes klètse en nò husj.

Dinzig 4 jannewarrie, de vergaddering van de vraolie van de Kieveloeët same mi Marijke béj de Nòstalgie. Ók dizze aovend waar gezèllig. De vraolie gòn d’r héllemòl vur. Alle aktievietéjte wore besproke en ók regele ze zèèlef ’n èntal dinge. Ze stòn bepaald nie èn de zéjléjn mèr doen vólóp mee….geweldig. Ók béj de vraolie èn ’t éjnd van d’ aovend mi z’n alle “lééve de Kieveloeët” en nog èfkes naoklètse en nò husj. Allieën duurde ’t naoklètse wa langer dan mòndig. (Marijke???)

Vréjdig 7 jannewarrie, óp utjnöddiging van ’t kómmietee nò de Brabantsetónpraot kampiejoensjappe mi ónze éjge tónpraoter Koen Verstappen. Wa ware ze àllemòl goe, bèùke van ’t lache inderdaad. Tónpraoters die we in de toekómst zeker zalle trugzie in Méél. De uurste kóntakte zin al geli.

Zòtterdig 8 jannewarrie, wir vruug óp, want de buurt stóng óppe stoep mi vlagge, lampe, korsbuuëm, ruuëskes, sjup, bissem, hammer, néégel, ènzòverder, enz. Uurst ’n tas kòffie ingesjud en dòrnao laote wééreke. Tusse de middig èn de soep mi ’n bruuëdje. Ze han ’t verdiend want ’t zag t’r pèrfèkt utj. Nètjes verzèùregd, te zie övverdag en ‘snaachs. Buurt en “d’n nobber van hiernééve” bedankt.

’s Aoves waar ’t dan zò witj, mi z’n alle nò Panninge um onze “Vérrig” óp ’t Pieël en Maas fèstieval èn te moedige. Uurst ’n intervjoe vur eumroep P&M same mi Peter en Hans, dòrnao de zaal in èn ’n fésje baowe en wà vur ’n fést….vòllek zat. Nao de twédde pòwze waar ’t zo witj “Vérrig” óp ’t pódiejum. Flink wà suuporters inkluzief atriebuute béj ’t pódiejum, we liete zie wie Méél waar. “Vérrig” liet de tréjn goe réjje nò ’t vóllegende stasiejòn. ’n Fàntàsties óptréjje vur ’t publiek, suuporters en de Kieveloeët. Béj de prisjutjréjking han we jàmmergenóg te wénnig geskoord vur ’n pódiejumplats. Winnaars Niks Mier en Niks Minder utj Grashoek mi ur nummer “De Vastelaoveskilomaetervraeter” prófisiejat. De aafterpaartie begoos óp ’t pódiejum mi de andere prinse van Pieël en Maas ónder ’t genòt van ’n óptréjje van W-Dreej en dòrnao nòg èfkes verder in ’t tusjhónk “Kefee De Zwaan”. (’t waar wir vruug)

Zondig 9 jannewarrie, ’s mèèreges béj ’t Oranje Hotel èfkes binnegeloeëpe um te kieke hoe de kàrtverkoeëp vur de bónte aovende verliep. De zòtterdig waar al utjverkaocht en de vréjdig béjnao…klinkt goe. Dòrnao èfkes béj de sjutteréj nò binne en 6 böllekes d’r afgesjóte (viel me mee) en wà béjgepròt, zòàs zo duk. D’r viel ók veul te vertélle.

’s Middes nò de kantiene van R.K.M.S.V. wòr ik waar utjgenöddigd um as Prins Karnaval de lutjes te mage trékke vur de lóteréj óp urre Nééjjaorsbòrrel. De prachtige preesj ginge d’r as wèèrem bruuëdjes övver de tónbank. R.K.M.S.V. bedankt vur de utjnöddiging.

Mòndig 10 jannewarrie, same mi Peter, Hans, Mark en Math nò de basissjool vur de vastelaoveslèsse èn de bóvebaow. Èn de kinjer woor óp ’n duideleke menier les gegévve dur “méster” Peter övver de vastelaovend en alles wà mi vastelaovend te make hi. Zèllefs vur méj nòg intresant. Mi ’n vloejende pòwerpoint presentasie, fotoos en nòg veul mieër krege die kinjer van alles veurgesjótteld. Ók övver de Kéjsjeut woor ’t ieën en ander vertééld, de kinjer ware entosiejast, dè kumt zeker goe, sukses t’r mi Kvw. Nao afloeëp leuke vraoge van de kinjer die,die toch wal ’s moejlek te beantwoorde ware.( ze wore als mèr slimmer). Nòg èfkes béj onze Niek in de klas óns gezeecht laote zie en dan wir nò husj.

Zòàs géllie ziet de uurste “rustige” wéék as Prins Ger I (’t blieft fantasties).

In de maot tot ’t leeste uur
Mi min vastelaovesvuur

Utj ’t dagboek van de prins dél 3 (Méél, 27 jannewarrie)

Kieveloeëters en Kieveloeëterinne,

Nao ’n wéék rustig èn, ging ’t wér van start (éjndelek).

Woensdig 19 jannerwarrie: Uurst èfkes nò D’n Binger wòr de Rò van Éllef en ’t Kómmietee de zaal sjòn han èngekléd. ’t Podiejum ingereecht mi de tòffels in ’t gelid (in de maot).

Mi Peter nò “De Zwaan” wòr we óp utjnöddiging van de Bubs de winnaars moochte feliesietere mi ’t goe raoje van de naam van de néjje Prins in urre Prinsepoel. ’t Goej antwoord waar traowes Ger Basten. De Bubs ha vur allebéj de winnaars ’n sjòn winjpakket samegestééld. De Winnaars ware traowes Jeanette (övverbure) en Wendy (sjònzeuster). Verdaacht?? Dòrnao nòg èfkes ’n paar uurkes naogekletst mi de Bubs, mi ’n pilske, bitterballe, frikkedèlle, apeneutjes en bòrrelneutjes. ‘ne Gezellige aovend mi ’n gezellige klup.

Vréjdig 21 jannewarrie, zòtterdig 22 jannewarrie, zóndig 23 jannewarrie, de bónte aovende en middig in D’n Binger in Méél. Ik ha me vur de vréjdig toch mèr afgemeld béj de hèrmenie, want ik moost éjgelek obere. Óp vréjdig en zòtterdig zaat de zaal sjòn vol, óp zòtterdig zèllefs utjverkaocht. Beginnend mi de Méélse vastelaovessjlagers die de sfeer al goe ènzwéngelede. Dòrnao ‘ne sjòn ópgezitte buut van Conny Opbroek ópgevòllegd dur ’t duwo Mona mi urre Méélse kòlder. Wim Joosten sloot ’t réjke vur de paowze af as ‘ne echte Boa.

Nao de paowze viel W-dreej de zaal binne en D’n Binger barste utj zin voege, wa ’n fést. Tòffels, stuul en ander materiejaal bleve nie óngebruukt. Nao ’n grandiejoze toegift, kwaam de reust wér in de zaal en ginge we verder mi Toon , Giel en Perry (of anderseum). De “buut van Koen Verstappe” waar geweldig.

De leeste buut woor verzèùregd dur Frank Schrijen as “Lulletje Rozewater”, króm geléége van ’t lache.

Afslutjer van d’n aovend ware natuurlek de Érpelmèèndjes die ’n prófessiejonele sjów wégzate ónder léjding van Tante Es, wa ’n talente (joong boere). ’n Leuke interaksie mi de Prins en as afslutjer ’t liedje vur de prins gezónge dur Geert en René, indrukwekkend.

Óp zòtterdigaovend ha ik nog de ieër um Koen Verstappen (d’n echte) te óndersjééje vur zin 33 jaor tónpraote/buutte-rede. Héj waar blééj verrast.

Óp zóndig woor dur de meeste van dees artieste alles nòg ’s dunnekes övvergedao. De ènwezige hebbe geweldig genote.

Di bonte wiekend waar vur méj ècht indrukwekkend, wà ’n beléévenis. De aovende ware strak geòrganiezeerd wa dur artieste en toesjaowers enorm woor gewardeerd. Iederieën bedankt.

Zò gòn we verder……….

Prins Ger d’n Uurste (Nie kepót te kriege).

In de maot tot ’t leeste uur
Mi min vastelaovesvuur

Utj ’t dagboek van de prins dél 4 (Méél, 2 fibberwarrie)

Kieveloeëters en Kieveloeëterinne,

Afgeloeëpe wéék wér van alles meegemakt.

Zòtterdig 5 fibberwarrie
Toevallig of nie mèr afgeloeëpe zòtterdig 5 fibberwarrie ware Marijke en ik 11 jaor getraowd. Ik ha di al versjillende kérre tege vorst Peter gezi of we hier iets mi kooste doe, mèr héj gaf hier nie ècht ’n reejaksie óp. Ik vóng dè mèr gek. Waar de Kieveloeët toch nie bezig mi éllef of……..

Vurrige wéék bèèlde Peter óp dè we zòtterdig mi óns gezin um dréj ure klaor mooste stao in Prinse òrnaat. Héj kwaam óns èrges vur hale…mèr wòr vur, dè vertéélde héj nie. We stónge um dréj ure klaor mi d’n jas èn toe we meziek in straot huuërde en vur dè we ’t weeste stóng de Rò van Éllef, kómmietee, dames van de Kieveloeët, Goe Gehusseld, awres, sjònawers, bruur, sjònbruur en sjònzeusters mi de nééve en nichjes te zinge vur de deur…..wa ’n verassing. Ze han alles béj zich, koffie, taart, drank en…goej zin. Mi z’n alle ginge we nò d’n achtertuin wòr we in onze éjge prinse-tempel ’n goej fésje hebbe gebaowd mi live meziek van Goe Gehusseld en ceedees. As afrónding nog énne tot ’t leeste uur béj “De Zwaan”, wòr we d’n dag afslote. Wa ’n verassing… wa ’n fést!!

Zóndig 6 fibberwarrie
Nòg mèr net bekómme van geestere waar ’t tidj vur de Kééj Knappe Kwéékmiddig béj d’n Binger. Vanaf 13.00 ure stròmde de zaal lekker vol mi jeugd, awers, opa’s en oma’s, ooms en tantes die allemòl kwame kieke nò de artieste óp ’t podiejum. En wa vur artieste, ’t ware d’r veul, hél veul, fantasties. De óptrééjes wore tot in de puntjes verzèùregd in de maot mi éjge meziek, éjge tekste, èngelieërde danspasjes en allerléj atribuute, ’n goej pótensie vur de toekómstige liedjesaovende. Ónder léjding van vorst Peter en ’n sjurie die wit wòr ze övver praote waar ‘t ‘ne geslaagde middig. In de paowze woor dur ’t Kinjer Vekansiewèèrek in ’n sjów van “Ik haaw van Holland” de néjje Rò van Éllef veurgestééld mi dòrbéj de néjje vorst Milan Heeskens (béjnao buurre) en de nééj prinses Myrne Meulendijks. Kéjsjeuters en Kéjsjeuterinnekes as ik di zoeë zie kumt ’t héllemòl goe di jaor en zeker mi òllie spreuk….Mi aaltidj goej zin, gòjje wéj dizze vastelaovend de beuk d’rin!!

Dòrnao mi de haand in de ”tès” mee ópgeruumd en in ’t leeste uur d’r nòg énne óp gedrónke.

’t Sjéjd nie utj….

Prins Ger I

In de maot tot ’t leeste uur
Mi min vastelaovesvuur

Utj ’t dagboek van de prins dél 5 (Méél, 22 fibberwarrie)

In de wéék van Kééj Knappe Kwéékmiddig héb ik, óp utjnöddiging, ’n dél groepe bezoocht die vólóp bezig ware mi ’t baowe vur d’n óptocht. D’n énne zaat nog te lasse, d’n andere waar al mi de vèrrefkwast in de weer. D’n énne mi ’n bèkske koffie béj de hand, d’n andere mi de frietpaan, hèpkes en veul kratte bier. As ik zie hoe èntosiejast d’r wért gewérrekt èn allerléj krejasies dan belooft dè nog wa. De krejasies die wéére gebaowd héb ik, vur zòwitj meugelek beoordééld èn de hand van min “kievel utj ‘t loeëd” watterpas. En ik kan òllie verklappe dè alles tot nòw toe in ’t loeëd sté. Kieveloeëters en Kieveloeëterinne veul sukses en ik zie ’t tótaal wal vurbéj kómme mi d’n óptocht.

Ók bén ik vólóp bezig mi de veurberéjding vur de sluttelövverdracht. ’t Is ‘ne pittige kluif mèr ’t belooft ók wa. We zalle burgeméster Wilma Delissen van Pieël en Maas ’s laote zie dè wéj waardig de sluttel kanne bemachtige.

Óp vréjdig18 fibberwarrie ware wéj, prins, vraow en kómmietee, utjgenöddigd dur de baowkómmissie van de nééj te baowe sporthal in Méél um d’n uurste stieën te légge same mi Raf Janssen, kernwéthawer en Frits Berben ròdslid. Nao ’n kort weurdje van ons dréjje woor d’n troefel ter haand genómme en moochte wéj ieder ‘ne stieën mestsele. Ge koos wal zie dè die hérre nie duk ‘ne troefel in de haand han gehad, utj ’t verband, tege ’t tòwke en spesie óppe stieën. D’r zal óp die plats wòr de uurste dréj stieën ligge wal ‘ne groeëte struuk gezit wéére.

Óp zòtterdig 19 fibberwarrie bén ik ’s mèèreges mi vorst Peter nò Remeund gegao um béj de Oranjerie mi ’n dartig tal Midde Limburgse prinse óppe foto te gao vur Dagblad de Limburger. Sjòn um al die prinse te zie in ur éjge gebruukeleke krejasies mi allerléj klurre en franjes, jokers, narre en nuum mèr óp.

Saoves ware Marijke en ik utjgenöddigd dur de Érpelmèèndjes um béj “De Siem” de dvd te kómme bekieke van d’n bónte aovend. De dvd die dur Mart Gommans waar samegestééld, liet zie mi hoeveul plezier en ’n strakke veurberéjding ’n fantastiese èkt óp ’t pódiejum wérd nérgezit. Dòrnao hébbe wéj tot in ’t leeste uur mi meziek van DJ Erwin V ‘ne hélle gezellige aovend belééfd. Lòt de dòlle mòndig mèr kómme. Ik dink dè ik minne spreuk mèr lot verandere tot “in de maot tot ’t énnaoleeste uur”, want ’t werd iedere kieër laat. Érpelmèèndjes bedankt vur de utjnöddiging.

We zien ’t wal….

Prins Ger I

In de maot tot ’t leeste uur
Mi min vastelaovesvuur

Utj ’t dagboek van de prins dél 6 (Méél, 10 mért)

Kieveloeëters en Kieveloeëterinne,

’t Hi èfkes geduurd mèr hier issjie wér “utj ’t dagboek van de prins”. Dizze kieër ’n laang ediesie.

Óp zotterdig 26 fibberwarrie ’s middes nò RKMSV vur ’t èffe-bal. In de kantiene waar ’t gezellig druk en ware d’r allerléj óptrééjes. Toen we de èffe-prinses Julie han ónthuld ginge we nò butje ’n parkoeertje af mi ‘ne voetbal, ik tege Julie. Julie ging d’r as ’n speer vandur….Dòrnao nog ‘ne wedstréjd tege de jeugd gevoetbald. Wa hébbe die ’n kóndiesie en vòlges méj waar ’t veld vruuger kléjner. Nog èffe trug in de kantiene nao-bòrrele en béjpraote. ’t Waar ‘ne gezellige middig.

’s Aoves nò Kefee Parties vur óns mómbakkesbal. Van te vurre al ’s geïnformeerd of t’r iemes hin ging, mèr niemes ging, ze han of ‘ne verjèùrdag of ’n brulleft of wa anders. ’t Zao nie druk wéére. Mèr tege 22.00 ure zaat kefee Parties toch behuurlek vól. En wa ’n sjòn krejaasies, lélleke vraolie, zèk, sjutters, kittels, prachtig gesjmienkte Kieveloeëters en Kieveloeëtrinne en noem mèr óp. De ènwezige han d’r ‘ne hoeëp tidj in gestoke en bleve goe in hur rol. D’r liep ók nog ‘ne mysterie guest rónd die mèr moejlek te raoje waar. En zèllefs min éjge vraow koos ik nie vinge.

Um 23.11 ure koos ik éjndelek ’t dé-maskee utjroepe want ik waar toch wal benéjd wie d’r àllemòl onder die kreejasies zate. Verrassend wie d’r àllemòl tevursjeenj kwame, kammerèùj, femielie, vriende, awd prinse en noem mèr óp. Naodè we de sjònst gesjmienkte in ’t zunneke han gezit, ginge in énne kieër de nooddurre ope en wie kwaam dòr de zaal binne….de hél sjutteréj. De gruun van Méél. Nao ’n kórt toespraakje van Sjra Stultiëns, woor de meziek gestart en zóng de hél sjutteréj ’n zèllefgemakt liedje “Ger van de gruun is de prins van vastelaovend”, en ’t klónk as ’n klökske….àllemòl in de maot. ’t Waar tot in de leeste uurkes gezellig.

Óp zóndig 27 fibberwarrie wore we um 11.11 ure verwaacht béj De Zwaan, want d’r waar ’n verrassing. De gruun bus van Roetje Gielen stóng klaor en we wore nò ’t klupgebaow van de sjutteréj geréjje. Dòr ware veul leeje van de sjutteréj ènwezig um ’t prinssjap te viere…. En natuurlek mi ’t liedje “Ger van de gruun…..Naodè we ’n èntal mense in ’t zunneke han gezit waar di wér ’n zeker geslaagde…. alwér ’n groeëte verrassing.

Óp mòndig 28 fibberwarrie ware óp utjnöddiging van de ‘Méélse Dörskes” in d’n Binger um aldòr mi hur ’n fésje te baowe. Nò ’n èntal óptrééjes en pólónéézes ginge we wér husjwaarts.

Óp woensdig 2 mért zin we béj ’t zèùregsentrum St. Jozef in Méél te gast, same CV De Ulewappers utj de Nirkant. In de sjòn versierde binnetuin van ’t zèùregsentrum waar ’t gezellig druk mi bewoners, vréjwilligers en verzèùrgeres. Geweldig um te zie hoe dees mense zò geniete van alle óptrééjes en de liedjes die wore gezónge. In ‘ne lange pólónééze same mi de Ulewappers en stageloeëper Michel hébbe we de ènwezige ‘ne leuke aovend bezèùregd. Dòrnao nòg èfkes nò “De Nostalgie” um same mi de medewéérekers de aovend af te slutje. Óndertusse woor Marijke béj “De Zwaan” gehuldigd as prinses vur èfkes.

Óp dónderdig 3 mért same mi Vorst Peter nò ’t wagereechte van de Kéjsjeut. De Kéjsjeuters han same mi de aowers de wage wér netjes ógebaowd.

Óp vréjdig 4 mért ’s Mèèreges uurst nò “Stichting Daelzicht” óppe Banmeule wòr ik same mi de Prins en Prinses van Stichting Daelzicht óp ’n ludieke menier de dólle dage ópstarte, dòrnao nò Stichting Kinjerópvang Méél wòr in “de kléjnje binger” ’n fésje woor gebaowd mi de allerkléjnjste, in ‘ne sjòn versierde zaal en mi goeje meziek.

Vervólges nò de klas van ónze Niek, wòr alle klasgenote spesiejaal vur de Prins ’n liedje han ingestudeerd. Óppe gang same mi de ónderbaow in ‘ne lange pólónééze nò de gimzaal wòr ’t ók wér gezellig waar. Tusse de middig friet mi sjnietsel béj “De Zwaan”. Nao de middig mi de Kéjsjeut nò de groeëte Binger wòr de vuutjes wér van de vloer ginge.

’s Aoves waar ’t dan zo witj, de bus in en de grens övver nò ppppppPanninge, wòr in ‘ne bómvólle Heuf de “sluttel” diende te wéére bemachtigd. Alle 11 kéérekdèùrepe krege de kans um hur planne te prissentere èn de burgeméster, wòrnao de sluttel woor övvergedrage. ’t Ging gemèkkelek, ik vóng te gemèkkelek um de sluttel binne te hale. In övverlég mi vorst Peter beslote we um Fred Bongerst trug te stuure nò Helde en de sluttel wér te övverhandige èn de burgeméster Wilma Delissen. Mi de bus wore we afgezit in Méél béj de Kievelloeëds wòr onze éjge prinsewage woor gereecht. De wagekómmissie ha wér allerléj ludieke aksies verzónne, de uurste verrassing waar ’t èksersiesie peletòn van de sjutteréj die in énne kieër de loeëds kwame binne geloeëpe en ’n stevig staaltje èksersiesie wéggave. Naodè we ’n vergaddering han beli woor d’r dur de 4 nééj van de roeëj ’n kado övverhandigd èn de Kieveloeët, namelek bierglaze mi ’t Kievelmènneke, leuk gedao jónges. Trug in de loeëds stónge de topkoks Peter en Frits klaor um óns te veurzie van heerlek ééte mi as toetje éjjer mi spek. Mi karaoke en andere ludieke dinge waar ’t wér zoeë laat. Óppe trugwég Peter Verstappe utj béd gezónge en dòrnao zèèlef snel nò béd….’ne lange leuke dag.

Óp zòtterdig 5 mért mi z’n alle nò de kéérek vur de vastelaovesmis. Vólle kéérek mi de meziekale óndersteuning van “Die Heimatkapelle”. Dur Sibbe woor d’r ’n dankwoord utjgesproke nò pestoeër Schoenmakers, die zichtbaar onder d’n indruk waar. Vervólges same nò d’n Binger wòr we vur de twédde kieër próbeerde de sluttel binne te hale, same mi prinses Myrna en Vorst Milan. Burgeméster Wilma Delissen waar moejlek övver te hale mèr utjéjndelek ware de planne en prójekte vóldoende ónderbaowd en krege we de sluttel wòrdur we 3 dage vastelaovesburgeméster wore. Béj ’t Kievelmènneke hebbe we de vlag gehese wòrnao we béj “de Zwaan” de övverwinning hébbe gevierd tot in de late uurkes.

Óp zóndig 6 mért waar ’t dan zo witj, de groeëte “bónte stèùrem”. En inderdaad groeët, mi mieër dan 500 délnemers, bónt in alle klurre en ‘ne stèùrem van iedeeje nò ènléjding van de spreuk “In de maot tot ’t leeste uur, mi min vastelaovesvuur”. Ónvergéételek hoeveul mense van groeët tot klien, van jóng nò awd, god wét hoeveul ure ze d’r ingestoke hebbe um same ’t plezier van vastelaovend te viere. Kwallietatief èrreg hògstònd allemòl. Stònde bove óppe prinsewage dur de Méélse straote, tusse prachtige kreejasies, tusse de mense…. ieën van min hògtepunte, mi de sjutteréj veuróp.

Zóndigaovend béj kefee Parties same mi sjokoprins Raymond ’n leuk ludiek uurke. Vervólges nò ’n bómvól “Oranje Hotel”, wòr de prisjutjréjking platsvóng. Èn ’t punteversjil kose ge zie dè de sjurie’t hél, hél moejlek hi gehad. Wa lag ’t allemòl deecht béj elkaar. De délnemers han ’t inderdaad vur de sjurie hél moejlek gemakt. Um 23.00 ure wér trug béj “De Zwaan” wòr we tot ’t leeste uur ’n fésje hébbe gebaowd.

Óp mòndig 7 mért ’n dagje kroegetocht. Beginnend béj kefee “De Stoep”, óp ’t énjd van Méél en Pieël en Maas, hartelek óntvange. Vervólges wér de bus in nò kefee Cole. Wòr ik de femielie en de nòbber van hiernééve fieguurlek in de bluumkes héb gezit. Ók moocht ik óp ’n ludieke menier van de femielie en van de nòbber van 2 durre richting Nirkant ’n èntal sjòn kedoos óntvange. Ók de Joong Harste han nog iets ludieks vur Marijke, Niek, Bente en méj….goej vòllek. Béj ’t Kéjsjeutebal wore de preezje utjgeréjkt vur de kinjer in ‘ne bómvólle zaal. Dòrnao mi z’n alle nò “De Nostalgie” wòr we nao ’t aovendmaal dur Goe Gehusseld wore verrast mi ’n interaktief spel. Mi de bus van Roetje vervólges nò kefee “De Siem”. Wa ’n fést, ’t uurste kefee wòr ik as prins Ger d’n dréjde woor binnegehald, ’t waar d’r nòg verèkkes druk. Um 22.00 ure wér trug nò “De Zwaan”wòr we tot ’t leeste uur ’n fésje hébbe gebaowd….alwér!

Dan kunt ‘r de dinsdig 8 mért, de leeste dag van de 3 dólle dage. ’t Kieveóeëte-treffe, wòr óptrééjes de revu passeerde en wa vur óptrééjes, geweldig in elkaar gezit, buukpinj van ’t lache. Alwér ’n hògtepunt, wannieër héélt ’t óp??? In ‘ne bómvólle zaal woor d’r dur iederieën enorm genote hiervan. Artieste bedankt.

’s Aoves nò kefee “De Nostalgie” wòr ók ’n uurke éjgelek te kórt waar, net zò as béj de “Vangrail” wòr we dur DJ John nòg wore verrast mi “Deurdonderen”. En dan is ’t béjnao zo witj….de afslutjing, de afslutjing van de 3 dólle dage béj ’t strieke van de vlag. Nòg èfkes béj “De Zwaan” mi de ènwezige ’n kléénj fésje baowe en dòrnao mi ’t kómmietee, rò van éllef, vraolie en Goe Gehusseld, mi de mense wòr ik hél kórt héb béj gestao en die méj enorm hébbe óndersteund, Pe, Arthur en Hans, nò ’t “kléénj kémmerke”van de Zwaan. ’n Geweldige afslutjing dur Sibbe en ’n geweldige afslutjing mi z’n alle….

’n Afslutjing tot ’t leeste uur mi de Kieveloeëters en Kieveloeëterinne in ’t kefee van de Zwaan, ’n afslutjing utj ’t buukske.

Óp woensdig 9 mért (aswoensdig) hébbe we mi de Kieveloeët, Goe Gehusseld en de éjge femielie ónder ’t genot van ’n drènkske en ’n hèpke ’n waardige (téjdeleke) afslutjing gevierd. Min prinsesjap duurt toch nòg tot de 1e zòtterdig of zóndig van jannewarrie 2012. Dus géllie zin nòg nie van méj af!!!!

De afslutjing.

’t Is dónderdig 10 mért 21.54 ure as ik bezig bén mi ’t ópstélle van di prinselééve dél 6. Ónder ’t tiepe van alle aktievietéjte en dinge die d’r zin gebeurd dees dage krieg ik soms toch wal ‘ne brok in minne kéél. Alle prachtige dinge die d’r gebeurd zin in dees dage, mi mense die ge goe kéént, mèr ók mi mense die ge van tevurre nie kéénde. Mi vorst Peter die méj enorm hi gesteund, adjudant Hans die övveral zèùregde vur ’n hèlpende haand, kledingman Arthur die d’r vur zèùregde dè ik t’r aaltidj netjes ópstóng , ók mi ènmoedigende weurd, ’n kómmietee dè ‘ne kéj is in ’t organiezere, ‘ne rò van éllef die ‘ne kéj is in de utjvoering hiervan, de vraolie van de Kieveloeët die béjnao övveral béj ware, Goe Gehusseld die alles meziekaal ónderstripte, femielie die enorm hébbe genote, de gruun sjutteréj die di alles geweldig hébbe ópgepakt en veural Marijke, Niek en Bente die ’ne fantastiese tidj hébbe meegemakt.

Wa me ók aaltidj béj zal blieve zin toch wal de “after-parties” tot ’t leeste uur béj kefee “De Zwaan”, wòr ik same mi ónder andere de “Bubs”, (hoe hawe ze ’t vól), nòbber van twé durre richting Nirkant, awd prinse, femielie, vriende, bekéénde, van tevurre nòg nie bekéénde en alle mense van de Kieveloeët, iederes kieër óp tòffels, stuul, vensterbanke, biljart en gòkkèèst nog ’n geweldig fésje baowde.

Mense bedankt….bedankt….bedankt….ónvergéételek.

Prins Ger d’n uurste, Marijke, Niek & Bente.

In de maot tot ’t leeste uur
Mi min vastelaovesvuur

Utj ’t dagboek van de prins dél 7 (Méél, 1 december)

Kieveloeëters en Kieveloeëterinne,

Nao ‘ne zómmerstóp van ’n paar mònd begoos ’t toch al wér te kriebele, wa gé ’t naojaor vur Prins Ger betieëkene. We begose mi ’n utjnöddiging dur de roeëj óp urre roeëje dag. Uurst ’n stukske gefietst en ’s aoves nò de októberféste. Gezellige boel mi ‘n sjòn opening. Roeëj bedankt!

De dienstevéjling liep ók goe, interessant ènbod mi goej biedinge wòrdur de Kieveloeët kan zörrege vur nééj steke vur kómmietee en rò van èllef. ’n Aovendje wòr ’t stiekem nòg behuurlek laat woor (of vruug?)

Dan waar ’t wér zò witj, hoe sjòn kan ’t zin um óp de 11de van de 11de in 2011 ’t vastelaovesséjzoen te mage ópene. ’s Mèèreges béj de Zwaan de nééj steke èngebóje en awd buurjóng John Evers geïnstalleerd béj de rò van éllef, vólóp geniete. Dòrnao mi de sjoolkinjer nò ’t Kievelmènneke wòr ik same mi Prinses Myrne ’t mènneke ‘ns goe héb gewasse. Um 11 övver 11 ware de 11 kenónsjote en versjes vertééld en ginge béjnao alle balonne de leucht in. Béj de Zwaan ‘ne heerleke lunjsj genuttigd wòrnao we afsjéjd name van Math en René. Sibbe verwoorde goe wà dees mense han betieëkend vur de Kieveloeët. Ók kwame Vorst Peter en Henk èn de beurt as jubielarisse. Alle wore mi ur partners ruum in de bluumkes gezit. ’n Laang réj feliesietasies vòllegde. Um 5 ure waar ’t dan zo witj, W-dreej in ’t kefee, laote we zégge in ’n bóm vól kefee. Geweldig um vanaf ’t pódiejum die “bómvólle arena” te zie. Nao de toegift bleef ’t nog laang ónrustig. De ópening ha nie bétter kanne zin.

Afgeloeëpe zòterdig waar ’t dan zo witj. De rò van éllef, wér èngevuld mi de éllefde man Roel Vullers, en geniete van 12 óptréjes in d’n Binger in Méél. De zaal waar al vruug goe gevuld. Afgetrapt woor d’r dur de tòp dréj van de Kééj Knappe Kwéékmiddig van begin di jaor. Herinneringe kwame wér bóve. Dòrnao koos iederieën zin liedje zinge in de gelótte vòllegorde. Nao de paowze kooste de artieste zich vur twédde kieër laote zie. Stuk vur stuk goej liedjes mi goej Méélse tekste. ’n Moejleke taak vur de zjurie. Nao wisj beraad waar de utjslag bekéénd. ’t Duumke ging nò Kumtjie in ur iets te strakke pèkskes. De tòp dréj woor dòrnao bekéénd gemakt, mi óp dréj Krèk Goe, óp twieë Vérrig en óp ieën Óngerakkesen Doorst die ur leeste rundje nòg ’s deun övver din. Zeer verdienstelek dè ze ók nòg vur de éllefde kieër mee din.

Jao Kieveloeëters en Kieveloeëterinne, de leeste uure zin geslage, mèr ’t vastelaovesvuur is nòg zeker nie gedoeëfd. D’r zit nòg wèèremte genóg in vur ’t Sjééle Waazel Gala en ’t afsjeid óp 7 jannewarrie 2012. We blieve in de maot loeëpe.

Prins Ger d’n uurste

In de maot tot ’t leeste uur
Mi min vastelaovesvuur

Utj ’t dagboek van d'n awe prins dél 8, teves leeste dél (Méél, 8 jannewarrie)

‘ne Tidj van kómme en ‘ne tidj van gao…….

Kieveloeëters en Kieveloeëterinne,

Mi ’n fantasties Sjééle Waazel Gala nòg vers in ’t geheuge, wòr we Roel Vullers installeerde béj de rò van éllef, luide wéj ieën jannewarrie ’t jaor 2012 in, same mi de rò van éllef, kómmietee en dames kwame we béj èlkaar béj “De Zwaan” wòr we prooste óp ’t nééj jaor en alles wà ’t óns gé brénge. Ik moocht de groeëte foto van de muur hale en de prinse foto óp de wand hange béj min 59 veurgangers.

En dan is ’t zòwitj 7 jannewarrie, ’t afsjéjd. D’r is ‘ne tidj van kómme en ‘ne tidj van gao, dè is zò en dè blieft zò. Ge slutj òw prinssjap af en géft de scepter övver èn òwwe ópvòlger.

’s Aoves kómme we béj èlkaar óppe Meulebaan wòr we ónder ’t genòt van ’n tas koffie en ’n stukske flaai beginne mi ’t afsjéjd. Goe Gehusseld wérd dur de veurzitter verassend vurzie van ’n èntal attriebuute en Sanny Vullers wérd offiesjeel geïnstalleerd béj de dames. De roewej hébbe ’n ludieke aksie wòrbéj ik vòlledig geréjnigd wéér mi alles wa mèr roewej is. Ók moet ik minne mónd spuule vanwege bepalde utjsprake. Vur de rò van éllef héb ik iets gemakt wà vur de toekómst genóg spéjkers mi kóppe zal slao. Dan wért ’t tidj um óns te verkasse nò kluphusj “De Zwaan”, ’n kluphusj wòr ik enorm veul herinneringe èn héb övvergehawe. Dòr èngekómme zit ’t àl gezèllig vól en is ’t meugelek um mi de ènwizzige mense herinneringe óp te hale. Nie veul latter huuër ik ’t geluid van de sjutteréj, kòrps sjutters, eksersiesiegroep en marketensters kómme “De Zwaan” binne en speule ónder léjding van Erwin Daems ’n èntal stukke, “De Zwaan” treelt óp zin funderinge en panne rammele van ’t daak. En dan is ’t zòwitj, de leeste speech. Veuràfgònd héb ik Huub Lemmen en buurman Wim Hoebergen èngenaam verrast mi ’n óndersjéjjing. De leeste speech, wòrin ik héb kanne vertélle hoe wéj as gezin dè prinsejaor hébbe ervare, en moochte we ónze dankbaarhéjd utjsprééke nò degene die di àllemòl hébbe meugelek gemakt. ’t Waar ’n geweldig jaor, ’n fantastiese herinnering, óndersteuning utj alle huuk en gò zò nòg mèr èfkes dur.

Nao de óntvangst van versjillende sjòn kadoos makte wéj óns óp vur de trip nò ‘t “Oranje Hotel”, wòr de néjje prins al zaat of stóng te popele. Èfkes kórt trugkómmend óp di geweldige jaor is ’t zò witj, ik woor “afgetuugd”. Veurzitter Sibbe Gielen óntdee méj van minne scepter en vorst Peter en adjudant Hans óntdin me van de steek en jèske. Dòr stao ge dan “kaal”, ’n gèk gevuul. Al snèl genóg woor ik in min toekómstige blaow jèske gehese en woor ik dur de awd prinse óppe proef gestééld. Nao de goekeuring kreeg ik de grune steek óp en woor as uurste jaors gruuntje ópgenómme béj de awd prinse garde. De spanning steeg, wie wért minne ópvòlger, nao ’n sportieve èkt kumt vanutj de zaal minne ópvòlger Rudie Martens, ‘ne zeer waardige ópvòlger.

Prins Rudie d’n Uurste wért fantasties óntvange. Óppe achtergrónd is ’t wàl èfkes wénne, mèr ik vermaak me priema tusse de féstende mensemassa en Prins Rudie kriegt same mi Resy de èndacht die zéj verdiene.

Vur méj zit ’t Prinsejaor d’róp, begónne 2 jannewarrie 2011 en geéjndigd óp 7 jannewarrie 2012.

Enorm veul dank èn de mense die ik kén, mense die ik van te vurre nog nie kéénde, de Bubs, buurt en bure, sjutteréj, famielie, bruur van de prins, vraow en kinjer, awd prinse, Goe Gehusseld, rò van éllef, kómmietee, klieërman Arthur, adjudant Hans en as leeste natuurlek Vorst Peter.

Sjòn dè géllie d’r ware en we hébbe ’t Ger gedao……hòjje.

Ger, Marijke, Niek en Bente Basten