't Prinselééve van Prins Jarno I
Prinselééve dél: 20
Vastelaovesdinzich
Bezuu:k prins Ries
De òffiesjeele leesten dach van de Vastelaovend. Smèèrges hébbe we éffe vréj èn kanne we 'n paar uurkes utjslaope. Tòch zin we al wa érre óp pa dan éjgelek óp de plènning stóng, want we han NÒCH enne prins in Méél. Prins Ries I.
Prins Ries I is prins gewórre óppe HeiKei in Haale. Vieja vieja waar der béj atjuudant Mark 't verzuu:k gekómme òf we éfkes langs wòn kómme. Óndangs prins Ries zèèlef nie zòveul meekrich van 't bezuu:k, waare de aawers, zin bruu:rke èn ander ènweezigge zichbaar èn 't geniette van óns bezuukske. Alwér 'n sjòn mómènt. Èn dan moet den dach éjgelek nòch beginne.
Kieveltrèffe
Tradiessiegetròw oopent de prins èn partner 't Kieveltrèffe mi ennen èkt. Spésjaal vur dizze èkt han Lisa èn ik 'n parredie veurberéjt óp Keihard Kermis, naamelek Keihard Karnaval. Krèk wie béj de òrzjieneele èkt mach der iemmes óp 't poodiejum tòwke trékke. Èn die tòwkes hééngt 'n mezieksòrt èn dè ‘genre’ wért dernao gedrèèjt. Sjòn um te zie: dè wa Joep èn ik òjt verzónne hébbe, ók in dizze vèùrem wir um veul èntoezjasme koos réékene.
Vervòlleges moocht ik wér platsneeme in de zaal um te geniette van de zòveulste verrassing. Wal haa ik wa hints gekrigge, mèr ik wees nie goe wa ik koos verwaachte. 't Prógramma ging witjer mi ennen èkt van óns femiellies. Ze han 'n éjge tèkst gemakt óp DE Méélse klassieker “Vastelaovesliefde”. De ópkómst van de femiellie waar wéj zò goe as kómpleet. Fantasties um dè èntoezjasme te zie:. Ik wees nie dè wéj zòveul zangtelènte in óns femiellie han.
De vòllegende in 't prógramma waare de kammerèùj. Ze han 'n sprékstalméster van ónze groep Bart Tulkens nò vurre gestuu:rt. Zò wie we dè ók alzelééve doe: as we örges anders 'n stukske veur moette draage. Bart hi 't puubliek al mee èn zin zééj asjie zi: “Sòmmigge kénne méj mesjiens van zie:, mèr de méste kénne méj dingk ik van 't loeëpe.” Utjéjndelek vòllecht der enne ‘roast’ saame mi sjòn weurt övver méj, Lisa èn ónze prachtigge vriendegroep. Ze slutje urre èkt af mi 'n éjge tèkst óp de hit van di jaor: “Ik Wooj nie Gaon”. De kórs óppe taart waar 't kedoo wa ze óns övverhandichde: enne 3D-print van 'n prinsefootoo van méj èn Lisa. Suuppersjòn, dangke wèl!
De vòllegende èkt han zich al 'n bietje óp 't wèèrek verraoje, mèr dòr lie:te ze zich nie dur utj 't vèlt slao: de kòlleegaas. Ze han óp de verrassingskèrstbòrrel al 'n lietje gemakt wa ze nòw ók wir lie:te huuëre. Nòchmaals dangk! Kaar-trékker van di ienietsjatief waar Angeliek, die ik éfkes latter óp 't Kieveltrèffe nòch 'n walverdiende óndersjééjing moocht gééve!
Dernao waar 't titj vur NÒCH 'n spòntaan óptreeje. Lins Snijders, lit van de sjutterééj, mèr ók van Goe Gehusseld, zee 'n èntal wééke geleeje: “We moette éjgelek wa doe: mi Lins & Prins. Al zò dik veurgekómme dè in òwwen tietel èn minne naam wa zit. “Géj óp 't drumstèl, ik óppe saksefoon.” Paar wééke latter, stónge we nòch steets aachter dè iedee. We hébbe óp de aachterkant van 'n viltje, wòr alle goe:j ideeje óntstao, enne sètlist gemakt èn marliefst énne kieër gerippeteert. Wa vòllechde waar 'n suupperleuk boonusóptreeje èn verbaasde gezeechte van mènse die nie weeste dè ik koos drumme. Sjòn! Wa Lins dan wér nie weest, waar dè héj ók 'n walverdiende óndersjééjing van méj moocht krie:ge.
Utjeraart koos de sjutterééj wir nie óntbrééke in di prógramma. In dizze kieër Mike Beckers 't woort èn prizzenteerde enne sjònne sjie:tbòm wòr utjéjndelek 'n sjòn spandoe:k woor ónthult. Ók binne de sjutterééj waar der nòch iemmes die ik géér wao óndersjééje: John van Rooij. Wa géj allemòl betieëkent óp di mómènt èn betieëkent hi is ècht bewóndereswaarech èn zeeker 'n óndersjééjing wért.
Dan waar 't titj um de óp én nao hòchste tietel van de Méélse Vastelaovend utj te gòn réjke. Nòdè Patrick Verstappen (Vastelaovesvierder 2023) mi teegezin 't Frètske haa ingeleevert, waar 't èn veurzitter René Naus um de néjje Vastelaovesvierder utj te roe:pe. Nao 'n spannende ópmaat, woor Mark Brummans utjgeroe:pe as Vastelaovesvierder 2024. Di makt veur hèm 't séjzoen héllemòl kómpleet, want zinne zoon Teun is di jaor prins van de Kéjsjeut. Gewèldich mómènt vur di sjòn gezinneke.
't Kieveltrèffe woor afgesloote dur Bjorn & Mieke. 'n Óptreeje wòr ik al sins min utjroe:pe nò utjkeek. Ik haa ze naamelek zèèlef geboekt ÈN we zin mi óns vastelaovesgruupke al fèn vannaf 't uurste uu:r. Toe 't titj waar vur 't óptreeje zi vòrst Ron teege méj: “Kóndigge géj ze èn?” Ik kie:k em èn, èn twieffel enne sekónde òf héj dè zi vur de joeks, òf dètjie dè sirriejeus bedoelt. “Jao dè is leuk, géj kéént ze ók!” zi Ron. Ik ving 't gans priemaa èn ik gao gòw dè poodiejum óp. Óndertusse zie: ik dè te zaal wér bómmetje vólsté èn ik vraoch òf iedderieën vérrich is vur 't óptreeje van Bjorn & Mieke, suuksès! Utjeraart waar dè gans èn ur toevertròwt èn zitte de zaal óp feenoomenaale weezje óp de kóp. Wa 'n leuke puure artieste zin dè.
Bezuu:k èn de Véngneuze
Nao 'n óntzittent gezèllich Kieveltrèffe is 't titj um gòw wa béj de Heere te ééte um dernao nòch éfkes richting de Véngneuze te gao. As we dòr zin, laote de Véngneuze zie: dè ze nòch laang nie vérrich zin mi dizze Vastelaovend. Die gééve nòch vólle bak gas! Ik pik 'n bietje van ur innerzjie èn ik mérrek dè ik der ók nòch wal éffe teegekan.
Ók béj di mómènt zin de kammerèùj wir van de pertééj. Nie gans vréjwillich, want béj die groep zitter nòch én iemmes die ik pèrsee wao óndersjééje, naamelek Roel Peeters. Mi Roel vie:r ik al jòrre de Vastelaovend èn héj betieëkent veul vur de Méélse taal. 't Sjònne waar dè héj de óndersjééjing nie verwaacht haa, mèr zeeker wal verdient haa. Dangke Roel!
Vlach striekke
Èn dan vuu:l ik tòch dè 't énjtj in zeecht is. Ónder de leeste klangke van Goe Gehusseld loeëpe we nééve de roeëj-géél-gruu:n kéérek richting 't Kievelmènneke. Ik mérrek èn minéjge dètte émoosies hòst de övverhant krie:ge, want ik kie:k truch óp de sjònsten titj utj min lééve. Wa is di tòch biezónder um mee te maake.
Mèr 't zit der nòch nie gans óp, want we hébbe nòch 'n paar dinge te doe:. Veurdè we de vlach striekke, krie:ch ik van vòrst Ron nòch éffe 't woort. Ik kie:k um méj hin èn ik zie: hél veul mènse stao die ik de afgeloeëpe daach ónderhant nónstóp gezie: hép. 't Is suupperdruk béj 't Kievelmènneke, mèr iedderieën is stil èn wil huuëre wa ik te zégge hép. Wér 'n biezónder mómènt wòr ik nò nòch kieppevèl van krie:ch. “Lééve de Kieveloeët” wért ingezit èn ik gao saame mi Lisa de vlach striekke.
Afslutje béj de Heere
Èn dan gao ik tòch ècht de leeste kieër dizze Vastelaovend as prins aachter Goe Gehusseld nò binne béj de Heere. Toe ik nòch génne prins waar, krich ik van di mómènt alzelééve al kieppevèl. Hoe zal dè nòw zin dan...?
We kómme béj de Heere èn, èn we dingke allemòl 'tzèllefde: “Di gé nie paase”. Gelukkich hi 't pèrsenieël van de Heere 'n stukske van de zaal vérrichgemakt èn dè wért al gòwgenóch oopegegòjt. As émmel iedderieën binne is, stòn we gans kómpleet óp de Kieveltòffel: prins Teun, prinsès Fleur, prins Fer, prinsès Indy, vòrst Ron, atjuudant Mark èn ik. We gòn dan ók ècht afsjéjt neeme. Teun èn Fleur maage beginne mi ur afsjéjtsweurt. Prins Teun hi 't utjroe:pe van zinne pap as Vastelaovesvierder nòch in zin weurt verwérrekt. Prinsès Fleur èn prins Teun laote vur de leeste kieër urre spreuk huuëre èn ik mach ze de steek, de mantel èn de sèpter afneeme. Fantasties um ze binne 'n paar wééke zò te zien grèùje èn biezónder um mi de joong zònne spésjaalen bant te krie:ge.
Dan maage prins Fer èn prinsès Indy ur leeste weurt teege de groeëte groep ènweezigge vertélle. Gewèldich um te zie: hoe mèkkelek géllie 't woort vatte èn iedderieën bedangke vur dizze ónvergéételeken titj.
Dan mach ik èn min leeste weurt beginne. Ik perbeer ècht iedderieën te bedangke vur al wa ze vur óns gedao hébbe, mèr dè is éjgelek nie in weurt utj te drukke. Nòdè ik tòch degeene bedangt hép die ik hép wille bedangke, wil ik nòch én ding doe:. Minne druppel utjréjke. Den druppel is suupperspésjaal, want dizze maage mèr énne nò éjge keuze utjréjke. Toe ik wees dè ik prins zao wéére, waar di ieën van de uurste keuzes die ik gemakt hép. Ik zee örges in sèptèmber teege Lisa: “Minne druppel is vur Bart Tulkens.” De vaader van Bart, Hans, is al éwwich kammeraot van ónze pap. Dòr kumt óns vrientsjap ók vandaan, want we zin dréj wééke nao mekaar gebórre. Èn we hébbe mekaar dernao nòjt mér utj 't oeëch verlórre. Ónze bant is alzelééve hècht geweest, we weeste aaltitj wa we èn mekaar han. Èn dè, in kómbienaasie mi hoe poozietief Bart in 't lééve sté, is suupperbiezónder. Terwiel ik di èn ‘t vertélle bén, hép ik Bart zinne naam nòch nie gezi. Héj hi zèèlef ók nòch nie in de gatter dè héj den druppel krie:cht. Héj daacht: “Ò Jarno zal em wal èn zinne vaader gééve.” Mèr óp dè mómènt zach ik de aawers van Bart al mi de traone in de oeëge. Toe ik émmel Bart zinne naam nuumde, huuërde ik 'n groeët applòws èn zach ik Bart geémoosjeneert óp de Kieveltòffel klimme. Vur méj 'n hél biezónder mómènt wa krèk utjpakte hoe ik méj dè bedaacht haa.
Dan is 't tòch ècht 't mómènt dè ik de leeste kieër minne spreuk dur de miekrefoon laot galleme èn getrakteert wéér óp 'n groeët applòws. Méél dangkewèl!
't Mómènt woor afgesloote dur 'n prachtigge vèrzie van “Vastelaovend WOW”! Rudy haa mi Froukje gereegelt dè ze spésjaal vur di mómènt 'n rustigger, mèr pakkende vèrzie van di nummer kwaam zinge. Alle lampe ginge utj, wa 'n kieppevèlmómènt! Froukje èn Rudy, hartstikke bedangt!
Tradiessiegetròw gé de Kieveloeët nò boove vur 't mómènt óp 't kémmerke. Ieën van de gròtste raatsels van de Kieveloeët. Ók ik zal dòr nie al teveul övver zégge. Behalleve dè 't 'n suupperbiezónder mómènt waar. Zeeker ók vur veurzitter René die di vur de uurste kieër moocht doe: èn dè ècht mi vèrreve invulde! Talènt bénne géj!
Nòdè alle plichte gedao waare, vuu:lde ik de spanning èn druk van min sjaowers afgléjje. De kieloos óndersjééjinge moochte deraf, 't booveste knöpke lós èn alle rèmme lós. Nòrmaal gesprooke stao ik aachter de drèèjtòffel óppe dinziggenaovent, mèr nòw vuu:l ik me wie 'n vis in 't watter óp de Kieveltòffel. Heerlek nòch éffe 'n fésje baowe! Tradiessiegetròw wért de Vastelaovend afgesloote dur de klangke van Goe Gehusseld die óp di laate titjstip nòch mi 'n flingke dillegaasie zin. Ik vuu:l nòch wa leeste innerzjie dur min òrre stroeëme, èn ik vat nòch de Pòwke-troom èn hòw méj de leeste slééch nòch!
Dan is 't um richting husj te gao, mèr der stòn nòch wa kammerèùj die al de ganse Vastelaovend loeëpe te aaze óp de ‘minisnacks’ béj de prins. Lisa èn ik beslutje dè 't venaovent wal zao kénne. Mèèrge hébbe we tòch gén verplichtinge mér, tans nie ècht. Nie ellieën kammerèùj, mèr ók pap èn mam, èn John Lenders hébbe nòch nie genòch gehat. We zitte de fraajer èn, tikke nòch wa pilskes wéch èn kie:ke vast truch óp enne ónvergéételeke fentastiessen titj. Óndertusse is 't kwart vur zeuve, veurdètte leeste béj óns de deur utjgé èn wéj 'n paar uurkes gòn slaope.
'ne Kick-start mi goejje meziek, veuróp in ’t Kieveloeëteriek!
Prins Jarno I
Prinselééve dél: 19
Vastelaovesmòndich
Narregoon 2024
Di wért enne Goejje Mòndich. We maage óns wér mèlde béj óns kluphusj wòrnò we richting de Goejje vertrékke vur de Goejje Mòndich. 'n Ienietsjatief ópgepakt dur Medelo Narragoniam. As we dòr binnekómme, zie: ik utjeraart de femiellie zitte, mèr ók de kammerèùj zin der wér béj. Fantasties um te zie: dè ze övveral béj wille zin. Dè wòr ik nie um gevraocht hép, mèr wa gewoon óntsté. Gewèldich.
We beginne mi 'n óntbéjt èn laote óns verrasse dur 't prógramma wa Medelo Narragoniam in mekaar hi gezit. Ik hép hier èn dòr al wa hints èn tips gekrigge, mèr ik koos der zèèlef nòch génne roeëje drò utj ópmaake. Nòwjè ik lòt 't mèr gewoon övver méj hin kómme. Krèk veurdè 't prógramme begeent, krie:ch ik te huuëre dè ter 'n kientje gebórre is téjdes de Vastelaovend. “Tis der énne van Wesley Walenberg.” Suupperspésjaal dè ter in min prinsejaor ók 'n vastelaoveskientje gebórre is! Gröts óp!
't Prógramma begeent èn sprékstalméster Peter Daniëls begeent övver enne waare ‘bèttel’. Enne diezjee-bèttel. Ik moet 't teege iemmes ópneeme um Narregoon 2024 te wéére. Minne teegestander is niemmes minder as diezjee Frits Berben. Enne teegestander die ik nòch kén van de buun téjdes de sluttelövverdracht. Hoewal Frits zin nééj ingestuudeerde diezjee-moe:fs èrrech indrukwèkkent zin, lukte dè méj tòch um de bèttel te winne. Èn dòrmi waar ik Narregoon 2024. Dè betieëkent dè ik méj 't hòwte vaatje Lindeboom moocht ènslao, mèr dè waar 'n hél gehampel. Want ik haa vlak dòrveur enne nèt wa te groeëte narrekap óp gekrigge. De kap stóng nòch afgestéélt óp de kóp van prins Erwin I.
Femielliemómènt
't Prógramma woor ónderbrooke vur 't tradiesjeneel femielliemómènt van de prins. Min mómènt um min sjònaawers John & Vera, zus Sharon mi Jeroen, bruu:r Harwin mi Melissa, èn pap èn mam te óndersjééje. Vur di mómènt haa ik me van tevurre beest wal druk gemakt, umdè we nòrmaal nie zò dik de wardeering nò mekaar toe utjsprééke. We wardeere mekaar wal, mèr dè wért gewoon nie zò dik gezi.
Nao de nöddege veurberéjding, besloot ik um dè juust te umèèreme èn de rèst van Méél ennen inkie:k te gééve in óns gezin. Ieën vur ieën óntvinge ze van méj 'n walgeméénjtj woort èn 'n óndersjééjing. Lisa stóng derbéj vur de mèntaale hullep èn netuurlek um ieëderieën enne goejje knoe:vel te gééve.
Nòdè ik 'n sjòn weurtje teege iedderieën hép kanne zégge, zie: ik óns mam nò méj séjne... Harwin is jèùrich. Utjeraart waare we di nie vergééte èn han wéj 'n kedootje gereegelt. Harwin & Melissa wéére naamelek énjtj mért pappa èn mamma. Èn spésjaal dòrvur han we 'n toepasselek slèbberke laote maake.
Kéjsjeutebal
Hélaas lie:t óns prógramma 't nie toe um 't ganse middichprógramma van de Goejje Mòndich mee te maake, we moochte naamelek wér richting óns kluphusj um nòr 't Kéjsjeutebal te gao.
Béj 't Kéjsjeutebal vlie:ge die wichter méj um de èèrem èn bòwwe wéj saame mi prins Teun, prinsès Fleur èn de Rò van Éllef 'n tópfésje. We maage ók 't mómènt meemaake dè prins Teun & prinsès Fleur ur aawers èn kammerèùj maage óndersjééje. Mi dè Kieveloeëte-bloe binne de Kéjsjeut wért di mómènt èkstra biezónder. Ik mach ók van di mómènt gebruukmaake um minne wérrekgééver Willie Martens te bedangke èn te óndersjééje. Dòrnééve zitte we Rò van Éllef-lit Richard Tillemans ók in 't zunneke vur zin beweeze dienste béj de Kieveloeët èn béj de sjutterééj. Sjòn um die mèn te verrasse èn tòch éffe van binne te kanne raake.
Klökske rónt
Nò 'n heerlek aoventééte béj Nakal is 't titj um de sjaaj óp te gòn neeme béj de Vangrail. Ronald is naamelek in 't gaat gesprónge nòdè ter hélaas génne Dólle Mòndich mér béj de Siem is. Ze hébbe saame mi wa Méélse vastelaovesvierders 'n prógramma in mekaar gezit vannaf 11.11 smèèrgesvruuch. Ge kaant òw dus wal indingke dè te méste al aarech in den óllie zaate toe wéj dòr binnekwaame.
Ik lie:t me dan ók mèr verrasse övver wa we èn ginge trèffe. Hoewal de méste nie mér alles hèlder zaage, waar de sfeer suuppergezèllich èn woore we dur Ronald óp 'n fantastiesse menie:r óntvange. Ronald, dangke vur dees uurste tópeediessie van Klokje Rond.
Téjdes di mómènt waar ók Joep Melssen te gast. Minne Keihard Kermis diezjee-maot. Iemmes die nie ieën mèr twé puntjes óp de ie zit. Zò perfèksjoonisties as Joep kén ik niemmes. Vur méj waar dè ók ieën van de reejene um hèm te óndersjééje. Ók Joep waar énòrm verrast èn verieërt. Sjòn um te zie: hoe ge as prins di sòrt mómènte kaant kréjeere.
Aaftere in 't kluphusj
Nò 't fésje béj de Vangrail goe gevie:rt te hébbe, ginge we wér truch nò de Heere. Béj de Heere sté iemmes aachter de bar die ik géér enne kieër in 't zunneke wil zitte. Iemmes die alzelééve óppe aachtergrónt sté, mèr wal bèèrge mi wèèrek verzit. Dè duutjie béj de Heere, mèr dè ditjie ók téjdes óns verbòwwing. As Arjan ók mèr éfkes titj övver hét, dan stétjie vur òw vérrich. Arjan dangk vur alles èn 'n walverdiende óndersjééjing!
'ne Kick-start mi goejje meziek, veuróp in ’t Kieveloeëteriek!
Prins Jarno I
Prinselééve dél: 18
Vastelaoveszóndich
Vandaach bén ik krèk 3 mònt prins. Èn as we èn dizzen dach beginne, wit ik al dè di ennen dach wért vur in de buu:k. Mi di bómvólle prógramma, wértjie ónvergéételek!
Bluumke
Den dach begoos al vruuch. We mooste óns um kwart övver neege mèlde béj atjuudant Mark. Saame mi vòrst Ron, atjuudant Mark, Rò van Éllef-lit Roel Lammers èn Brendy van Dijk, ginge we Mariet Vercoulen verrasse.
Téjdes de looting van de Bónte Aovend woor de hooftprisj (ieddere éllefde van de mònt enne bós bloemme) vur 't twédde jaor óp rééj gewónne dur Brendy. Brendy besloot óp dè mómènt dizze prisj te övverhandigge èn Huub & Mariet. Wa 'n suupperspòntaan èn sjòn ienietsjatief. Wòr nòrmaal ellieën 'n Rò van Éllef-lit dizze prisj kumt övverhandigge, leek 't óns wal biezónder Roel te verstérreke mi Brendy èn 't ‘Dreigestirn’.
Toe we binnekwaame zaat de ganse femiellie al in de woonkammer. Die weeste netuurlek al van 't kómplót. Allieën vur Mariet waar óns bezuu:k 'n verrassing. Èn dè woor óntzittent goe óntvange. Biezónder um óp dees menie:r de femiellie 'n hart ónder de rie:m te kanne stééke.
Kievel FM
Hélaas hébbe we nie veul titj um laang te blie:ve, want we maage drèk dur nò de utjzènding van Kievel FM. Dòr waar ik as raadiejoo-maaker wal èrrech benééjt nòr. Émmel binne is de sfeer al mee gezèllich èn 't li 't nievoo van de grappe nie al te hòch. Nò 'n tas kòffie èn 't uurste prötje óp de raadiejoo is 't dan ók titj vur 't uurste pilske. Ik ving 't antoezjasme van John ènstéékelek èn we klètse saame dur minne Top 11 vastelaovesnummers hin. Nò 'n paar kérre gepròt óp de raadiejoo èn wa béjgeklètst te hébbe, wéér ik alwér afgelóst dur de vòllegende gaste: prins Teun èn prinsès Fleur. Vur óns hòch titj um veur te beréjde veur den óptòcht.
De bónte stèùrem
Lètterlek, mèr ók zeeker fieguurlek, ieën van de hòchtepunte van enne prins. Ik kie:k hier dan ók al wééke nò utj, umdè ik van alle kante utj ‘stille hints krie:ch’ van groeppe die meedoe:. Die spésjaal vur méj meedoe:.
Nééj di jaor is de startplèk èn de roette. We beginne naamelek béj 't Kievelmènneke èn we éndjigge wér béj óns mènneke. Hoe sjòn kannege 't éjgelek hébbe. Nòdè we béj de Heere hébbe genoote van enne utjsmitjer, is 't titj um richting 't Alleksanderpléjn te gao. Umdè we èn de vruugge kant zin (tjè dè gebeurt ók wal es), gòn we éffe béj D'n Binger nò binne. Dòr vatte we 'n pilske èn vat ik nòch éfkes 'n kruk um min kneuk wa te spaare vur den dach die nòch kómme gé.
Óp 'n gegééve mómènt gòn we nò butje um 'n reuntje langs alle groeppe te maake. Èn ik wit éjgelek nie wòr ik moet kie:ke. Allemòl iedeeje die óp méj nérkómme òf mi minne spreuk te maake hébbe. Övveral zie: ik footoos èn mómbakkese van minéjge èn 't èntal Le Sjief-loogoos kan ik nie mér óp twé haant télle. Wa is di tòch biezónder.
Langksaam zie: ik ók de buurt, kammerèùj, Summer Kick-Off èn femiellie 't pléjn óp kómme. Fentasties um te zie: wa ze allemòl verzónne èn gemakt hébbe. Mèr nòch sjònner um te zie: wie der allemòl spésjaal gekómme is um mee te doe:. Zeeker van de mènse wòr ge 't tótaal nie van verwaacht.
Veurdè den óptòcht begeent te trékke, wéér ik verzoocht um nòr de sjònste plèk van de prinsewaage te gao... boovenóp in 't midde. De uurste groeppe beginne èn den óptòcht èn kómme nééve de prinsewaage um de èkt vur óns te doe:. Dè is al 'n fantasties begin.
Alle groeppe zin ónderweeges èn we maage dan ók beginne èn den óptòcht. 't Utjzeecht vanutje prinsewaage óp de gekleurde straote wòr ik min femiellie veur me zie: stao, is 'n fentasties sjòn utjzeecht. Ge zòtter zoeë 'n sjilderééj van kanne, nee, moette maake! We trékke dur de straote èn ik zie: veul vòllek nééve de wéch stao. Goe:j tieëken, ók dòr kan ik van geniette!
Óppe roette li ók de buurt wòr ik groeët gewórre bén, Buurtverénneging 't Törrefhuukske. De buurt hi 't prachtigge ienietsjatief genómme um bènners te laote drukke. Dòrmi wòn ze méj wér wèlkóm héétje in de buurt wòr ik alzelééve gewónt hép. Suupperleuk ienietsjatief, dangke wèl! As we émmel de Zónnedòw ópdrèèje zie: ik de vòllegende bènner stao: 'n paar maote gròtter sté ter enne bènner mi min footoo deróp in de hòf van ónze pap èn óns mam. Veur de bènner is de övvergeblivve hèlleft van de femiellie ènt geniette van den óptòcht. Nééf Harold, die éjgelek nie meedit èn den óptòcht, kan 't tòch nie laote èn beslutj asnòch mee te loeëpe mi den óptòcht. Sjitterent um em zoeë te zien geniette van de Méélse óptòcht.
De bòjjem van de slókbèkskes kumt in zeecht, èn dè betieëkent mèr én ding: we zin hòst béj de Dèùrepstraot. As we de boocht maake béj de Vangrail ziet 't zwart van de mènse. Prachtich um zòn vól gekleurde straote te zie:. Ók óp de balkóns stòn de mènse, èn die perbeere we ók te wa lèkkers te gééve. We gòjje, springe èn zinge asòf 't lééve dervanaf hééngt. Émmel èngekómme béj de Heere, knalle we de kónfèttie-sjie:ters óns um de òrre.
Ik zie: 't Kievelmènneke deechterbéj kómme èn dè betieëkent dètten óptòcht deróp zit. Mèr nie vurdè ‘Min Liefdesplétje’ Lisa nòch éfkes óppe waage kumt. Ik vuu:l dè 't 'n hél biezónder én énmaolich mómènt is.
Nòdè ik van de prinsewaage afgesjraavelt bén, wille alle bekéénde groeppe éffe mi Lisa èn méj óppe footoo. Dòr maake we netuurlek alle titj vur èn 't géft méj de geleegenhétj um de kréjaasies nòch ens goe van deechtbéj te kanne bekie:ke.
Prisjutjréjking
Nò den óptòch gòn we béj D'n Binger nò binne vur de prisjutjréjking. Ik mérrek tòch wal dètte afgeloeëpe uurre de nöddege innerzjie hébbe gekoost. Mèr ók dòr hi kléjjingman Hidde méj goe óp veurberéjt èn ik wit me der priemaa durhin te slao.
Téjdes de prisjutjréjking kómme, vur méj, de mést die:rbaare groeppe nòch ens vurbéj èn kan ik ze allemòl 'n hant òf enne knoe:vel gééve. Vur méj ók de iediejaale geleegenhétj um Steffi Ackermann èn Zoë Levels te óndersjééje. Ze zin allebééj kòlleegaas van méj èn woone ók allebéj in de buurt. Steffi kóm ik dan ók nòch dikker béj de sjutterééj teege. In die kónneksie hébbe ze hél veul vur méj gedao èn dòr bén ik ze hél dangkbaar vur.
Le Sjief
Toe ik émmel prins woort, han Rudy èn ik bedaacht um tòch nòch 'n sètje te drèèje téjdes de Vastelaovend. Dè mómènt wil ik netuurlek nie èn méj vurbéj laote gao. Nòdè te prisjutjréjking afgeloeëpe waar, veranderde atjuudant Mark nòr minne ‘Tourmanager’. Ik stapte naamelek in zinnen Audi richting de Heere. “Dan hoevvege dè stuk in èllek geval nie te loeëpe.” Dè sórt òwtoos zie: ik ók alzelééve 't terréjn ópréjje as we béj Summer Kick-Off enne groeëte diezjee hébbe geboekt. Wa dè betrèft waar 't plétje al kómpleet.
We kómme èn béj de Heere, èn ik maak me vérrich um 'n uurke te gòn drèèje. Óndangs dè ik muu:ch begin te wéére, hép ik der tòch óntzittent veul zin in. Dè ik as prins aachter de drèèjtòffel mach stao, wért 'n uuniek èn hiestoories mómènt. Dè wért vantevurren ók nòch éffe in 't kémmerke dur Hidde èngestipt.
As èchte artiest gòn we vieja den töjn èn vieja de keuke richting 't poodiejum. Óp dè mómènt zin kòlleega diezjee Hans èn Patrick ènt drèèje. Ik gééf ze enne goejje high-five èn ik installeer min spulle. De leeste mómènte nééve 't poodiejum pèp ik minéjge óp, vérrich um de ganse zaal óppe kóp te zitte.
As ik óp 't poodiejum kóm, zie: ik dè 't nòch bómvól is in de zaal. Ik wit nòch dè ik furrech jaor ók óppe zóndiggenaovent drèèjde èn dè waar gewoon vur in de kroech. Sjòn um te zie: woe druk 't is èn woeveul mènse tòch éfkes nò méj kómme kie:ke.
Ik drèèj de uurste plaate, Rudy kumt méj 'n kaaw pilske brénge èn ik vuu:l me wir as enne vis in 't watter. Heerlik um aachter min drèèjtòffel te doe: wa ik óntzittent leuk ving. 't Duu:rt dan ók nie laang veurdètte zaal lós begeent te kómme. Ik mérrek dètte zaal der ók èkstra veul veul zin in hi. Dè gevuu:l hoopege as diezjee aaltitj te beréjke, mèr nòw bén ik der èkstra blééj mi. Die innerzjie van de zaal slö övver óp méj èn ik gééf de innerzjie drèk wér truch dur almèr gròttere vastelaoveshits te gòn drèèje. De wisselwérreking tusse méj, de zaal èn de spòntaane gastóptreejes zèùrege vur enne ónvergéételeke sèt. Èn 't énjtj van 't uurke, wa vurbéj vlóch, duu de ganse zaal mee. Mi 't zitte, springe, èn zinge, iedderieën duu mee. Di waar vur méj apsóluut de vètste diezjee-sèt utj min karriejèère.
Nao 't drèèje brénge we de spulle truch nò 't kémmerke èn is 't hòch titj um af te stééke èn de sèpter in te leever. Nòdè we truch hébbe gekeeke óp enne ónvergéételeken dach mi 'n uuniek énjtj is 't dan ók titj um de wéch richting husj te gòn zuu:ke. Mèèrge wér enne spésjaale langen dach. Dus we glippe veureum (vieja de veurdeur) nò husj.
'ne Kick-start mi goejje meziek, veuróp in ’t Kieveloeëteriek!
Prins Jarno I
Prinselééve dél: 17
Vastelaoveszòtterdich
Ginneraale rippetiessie
Nò wééke laang in den òwtoo èn tusj óp minéjge geoeffent te hébbe óp de tèkst van de sluttelövverdracht èn de mis, stóng zòtterdiggemiddich de ginneraale rippetiessie óp 't prógramma. Umdè 't de uurste kieër waar dè iemmes anders, butje tèkstsjrie:ver Bertine van Heugten èn vòrst Ron, min plan huu:rde, haa ik der tòch wal wa spanning veur. Tusj oeffene is dan tòch hél anders as enne vólle zaal.
Gewaapent mi de tèkst èn 'n markieërstift, vur de leeste aksènte, ging ik richting D'n Binger. Dòr waare keplaon Roger, alle heersers, vòrst Ron èn atjuudant Mark um alle tèkste nòch ens dur te neeme. Dòr vertéélde Roger hoe de mis zao verloeëpe èn wie der allemòl èn 't woort zòn kómme. In enne béjzin zitjie ók teege méj dètte Blaow sjutterééj ók 'n spésjaal plèk in de kéérek hi. Mèr dur de spanning èn kónsentraasie véélt 't kwartje nie èn gòn we witjer mi 't oeffene van de sluttelövverdracht.
Tèkstsjrie:ver Bertine èn mooder Victorien waare der ók um de leeste puntjes óp de ie te zitte. Ik begin èn min verhaol èn 't kumt derutj krèk wie ik 't geoeffent haa. Toe ik Bertine èn Victorien méj halleverweege 'n kómpliemènt gééve óp de menie:r hoe ik 't veurdraach, krie:ch ik 't gevuu:l dè 't allemòl wal goe gé kómme
Vastelaovesmis
Ik gao éfkes nò husj um te ééte èn me eum te kléjje, um méj vervòlleges te mèlde béj óns kluphusj. Van dòrutj gòn we ónder begeléjding van Die Heimat Kapelle richting de roeëj-géél-gruu:n verleechte Sinterklòskéérek. Ik loeëp de kéérek binne, èn ik zie: dè 't aawerwèts druk is in de kéérek. Sjòn um veul bekéénde te zie: die ik nie persee verwaacht haa in de kéérek.
De mis sté óp 't punt van beginne. Keplaon Roger löjt de bèèl, Kapellemeister Johan Theeuwen gé stao, ik huuër vanutj aachterin de kéérek de meziek. 't Duu:rt nòch gén vééjf tèlle, òf ik hèrkén de sjuttersmars die wéj béj de sjutterééj speule. Ik drèèj me eum èn ik zie: min éjge sjutterééj nò binne kómme. Suuppersjònne verrassing die ik, óndangs de stille hint van de keplaon, nie zach ènkómme. Utjeraart is 't blaow klupke wér rójaal vertiggewórrecht, mi ónze pap, Sjoerd Strijbos èn Sam Strijbos derbéj. Die lie:pe naamelek ‘gewoon’ mi de Kieveloeët mee de kéérek in, um zich dernao stiekkem nò aachter te begééve èn ur instruumènt te pakke. Ik kie:k atjuudant Mark èn, èn héj zi teege méj: “Jao, 't wért zònnen aovent”.
De sjutterééj sté óndertusse óp 't altaar èn ze speule de Méélse kulthit: Sun is Shining. 'n Plaat die òjt óp de aafterpartie van Summer Kick-Off is ónstao èn dangkzéj Hidde zin prinsejaor 'n ónvergéételeke plèk in de Méélse Vastelaovend hi gekrigge. Övver ónvergéételek gesprooke: hoe we sjutterééj èn die Heimat Kapelle saame Sun is Shining lie:te huuëre is ók gewèldich. Ik vuu:l 't kieppevèl nòch övver minne ruch loeëpe.
Der vòllecht 'n prachtich verzèùrechde mis mi 't toepasseleke teemaa: meziek. De weurt van prins Teun, prinsès Fleur, prins Fer èn prinsès Indy loeëpe as 'n geólliede mesjien. Der óntsté béj méj 'n gröts gevuu:l dè wéj de heersers van 2024 maage vèùreme. De mis wért afgesloote dur 'n walverdiende óndersjééjing van vur Piet Schers èn de priemeur van de lajf gespeulde vèrzie van Vastelaovesliefde.
Sluttelövverdracht
Tis titj um de belangriekste plichtpleeging vur de Vastelaovend te gòn doe:... we maage de sluttels binne gòn haale zòdè we ÈCHT kanne regeere övver 't Kieveloeëteriek.
'ne Kick-start mi goejje meziek, veuróp in ’t Kieveloeëteriek!
Prins Jarno I
Prinselééve dél: 16
Vastelaovesvréjdich
Vréjdich 9 fibberwarrie is de uursten dach wòrróp we van smèèrgesvruuch wies saoves laat vólle bak prógramma hébbe. Ik mérrek dè ik der vérrich vur bén èn hòst nie kan waachte um te prógramma te starte. Ók sjòn um te zie: dè te groep Kieveloeëters almèr gròtter wért. Nie iedderieën kan naamelek al vréj vatte, mèr ik zie: wal dè iedderieën zò gòw as meugelek wil ènslutje èn niks wil misse van de Vastelaovend.
Jóngk gelieërt
We beginne den dach béj Stichting Kinderopvang Meijel, lètterlek béj de jóngste. Sjòn um te zie: woe die klénje ók al Vastelaovend vie:re. As ik zoeë ens róntkie:k nò de pappas, de mammas, de oopaas en de oomaas dan zie: ik dè 't paplippel-prinsieppe alwér goe zin wèèrek duu.
Oppe Koffie
We vervòllege óns prógramma mi enne lunsj béj Oppe Koffie. Dòr roe:pe ze ók iedder jaor enne prins òf 'n prinsès utj. Di jaor is dè prinsès Carolien (van der Elsen-Schijven). Jèzeeker, dè is femiellie! 'n Nicht van ónze pap. Nòdè we genoote hébbe van enne heerleke lunsj, haa Oppe Koffie nòch 'n sjitterende verrassing gereegelt. De kléénjdaochter van Carolien, Janske, hi de Liedjesaovend óppe Grashoe:k gewónne mi enne prachtigge ‘ballad’. Ze han gereegelt dè Janske di béj Oppe Koffie kwaam zinge. Prachtich mómènt wòrbéj ik de nöddege traone al in de oeëge zach stao.
Wichteróptòcht
Nao 't bezuu:k èn Oppe Koffie ginge we nò de baazessjool vur de Wichteróptòcht. Vééjfhóndert wichter die óp òw kómst stòn te waachte. Dè waar al mee 'n prachtich mómènt. De nöddege high-fives wéére wér gegévve. Veuróp in den óptòcht lie:p ók 'n nééjkòmmer: Sjutterééj Sint Nicolaas (Sinterklòs). Övveral wòr ik bén, duukke zéj ók wér óp. Sjòn um te zie: dè ze alles zò fannetiek ópvatte. Wéj maage deraacherén loeëpe èn ik verbaas méj övver woeveul mènse der nééve de kant stòn te kie:ke. Fantasties um te zie: dètte Wichteróptòcht zò lééft.
Èn 't énjtj van de Wichteróptòcht stòn wéj te kie:ke nòr alle kréjaasies van de versjillende joenits. Suupperleuk um te zie: waffer kréjatievve iedeeje ze hébbe verzónne övver méj òf övver minne spreuk. Nòdè we iedderieën gezie: hébbe, slutje we 't bezuu:k af óp 't sjoolpléjn. Dòr stòn óppernééj zòn vééjfhóndert wichter béjén um 'n fésje te baowe èn wòr kan 't dizze Vastelaovend bétter óp as 't nummer van Van Lieshout & Arts. Ik kóm 't sjoolpléjn ópgeloeëpe èn méster Hidde hi de vastelaoveshit van 2024 al èngezit. Ónderweeges nò 't poodiejum krie:ch ik al óntèlbaar veul high-fives èn ik mach 't sjoolpléjn laote trille. Méster Hidde géft méj de miekrefoon èn saame mi de wichter laote we de aawers zie: wa féstvie:ren is. Iedderen dach geniet ik nòch van alle wichter die tegeliek utj vólle boorst “BOEM” laote galme èn mi de haant in de leucht 't dènske van dizze hit doen.
De leeste kieër aachter de meziekkaar
We gòn aachter de meziekkaar van de Kieveloeët wér truch richting óns kluphusj. Aachteraf bleek di de leeste rit te zin van de meziekkaar. De waage zò éjgelek zóndich veuróp in de óptòcht gao, mèr téjdes 't mónteere van de waage óp de lippels van de looder is der tòch wa misgegao wòrdur de waage nòw utj mieër ónderdélle besté. Achjao, hi de waagekemissie wér wa te hòbbieje de kómmende mònt.
De middich woor afgesloote mi 'n èntal óptreejes van de jeucht die ók téjdes de Kééj Knappe Kwéékmiddich hébbe ópgetreeje. Èn mi 'n óptreeje van Andy & Roy. Óndertusse kénne we mekaar, want ze waare ók al béj 't verrassingsfést van 't wèèrek. Leuke joong die ók nòch ens 'n sjòn fésje kanne baowe!
Machtsoverdracht Peel & Maas
Lisa èn ik vinge 't óntzittent gezèllich béj de Heere èn we hébbe éjgelek te wénnich titj um óp èn neer nò husj te gao um gòw wa te ééte. Um tòch mèr éfkes ennen bòjjem te légge, sjie:te we gòw éffe béj Egem nò binne. Éfkes latter mèlde we óns wér béj de Heere um richting de Grashoe:k te gao.
't Duu méj goe um te zie: dè femiellie, kammerèùj èn aaw-Kieveloeëters meegòn um méj èn te moedigge um die sluttel mee te neeme. Jòmmergenóch is burgeméster Wilma zie:k èn kan ze ur leeste machsövverdracht nie meemaake. Dèsalnietemin hébbe ze lookoo-burgeméster Erik Nijssen ópgetrómmelt.
Nao 'n weergaalooze pitsj van enne menutj van vòrst Ron kan Erik nie veul anders as de sluttel utjréjke. Nòdè di ók de ander prinse èn prinsèsse gelukt is, is 't titj vur 'n fésje. De nöddege póllónéézes wéére geloeëpe, mèr ik kan hòst nie waachte óp 't óptreeje van Men In Pek. Zéj hébbe naamelek di jaor 'n fentasties sjoengkelnummer gemakt. Óp 'n gegééve mómènt huu:r ik dè ze 't nummer inzitte èn mee stòn alle prinse èn prinsèsse óp 't poodiejum. Sjoengkelent geniette we van 't nummer èn ik huu:r dè de zaal mi óns meegeniet.
In de tussentitj maak ik 'n reuntje dur de zaal èn geniet ik van alle bekéénde utje geménjtj mi wie ik éffe 'n prötje kan maake. Óndertusse sté de bus vérrich um óns wér nò Méél te brénge.
Waagereechte
Nao de machsövverdracht sté 't waagereechte óppe plènning. 't Énnechste mómènt wòr we allieën mi de mèn van de Kieveloeët ónderén zin. De kemissie haa vantevurre mi 'n sjòn viediejoo 'n utjnöddeging gemakt. Dòrrin makte ze 't teemaa bekéént: OLS. Minnen òwtfit waar gòw gereegelt: min sjutterspak. Ik keek utj nò dizzen aovent, want ik wees dè Jurgen Kessels, DJ Juk, der zao zin. Héj is naamelek iedder jaor diezjee óp dizzen aovent. 't Sjònne dervan is dè Jurgen prins waar toe ik Kéjsjeuteprins waar. Ik waar dus hél benééjt hoe héj der 'n fésje van ging maake. Mèr toen... toe kwaam ik de Kievellòts binne. Min oeëch vie:l nie mee óp DJ Juk, die der wal gewoon waar, mèr min oeëch vie:l óp 'n bekéénde versjéjning. Ze han naamelek 't Willum-pak van 't OLS wér van stal gehalt. Dè pak hép ik afgeloeëpe dréj mònt dikker gezie: as 't OLS zèèlef. Willum stóng óp min plèkske: boovenóp die prinsewaage.
Drèk beginne méj de raadars te drèèje: Wie zao dòr in gòtsnaam inzitte? De kwartjes valle nòch nie. Marc Philipsen ruupt méj nò boove èn ik moet Willum óntmaskere óp dezèllefde menie:r woe ze méj téjdes 't kómmietee-utjkómme mooste óntmaskere: vraoge die ge mi jao òf nee kaant beantwoorde. Te'jdes de uurste vraoge hép ik nòch nie ècht iedee. Mèr nao 'n paar vraoge begin ik de mooteriek te hèrkénne. Èn ik stèl nòch 'n paar vraoge um nie veul latter minne diezjee-maot Joep Melssen te maage ónthulle. Nie allieën bén ik poozietief verrast, ók Joep zèèlef. Al isjie vurral blééj dè héj utj dè bloethieëte pak utj mach doe:.
Dè is nie de énnechste verrassing die ze vur méj impetto han. We gine naamelek óp di spésjaale OLS ók ècht sjie:te. Buksméster Mike Beckers waar ópgetrómmelt um mi ónze winjtjbuks enne sjie:twétstréjt te léjde. Óndangs dètter versjillende tallèntvólle sjutters tussezaate, wao 't Kievelmènneke dizze kieër nie nò ónder hin kómme. Nao wa hullep van de buksméster kwaam der dan tòch enne winnaar utje bus.
Nòdè we de prinsewaage van tóp tòt tieën gereecht han, waar 't titj um wir richting de bebaowde koom te fietse. Méj waar al ingeflusjtert dè we óppe truchwéch enne tussestóp hébbe. Béj femiellie Verstappen (Prins Peter III, 2007) stóppe we, èn stòn we mi zen alle óp 't fietsepa ingehèùkt ópgestéélt. Ik moet as prins zinde ènbèlle. Vervòlleges zinge we utj vólle boorst ‘Lééve de Kieveloeët’. 't Is sakkedusjter béj heuzje Verstappen. Zao de tradiessie hier stóppe? We zinge nòch nèt wa harder èn utjéjndelek zien we 'n lèmke èngao. YES! Tis gelukt. We hébbe Peter den dréjde wakker gezónge. Der wéére tradiessiegetròw 'n paar flèsse bie:r gedróngke èn sjòn verhaale gedélt.
Uurste langen dach zit deróp. Ik geniet van alle tradiessies, van alle jeucht, van alle aawers èn van alle prinse èn prinsèsse, èn van alle ander vastelaovesvierders. Óndangs dè ik in de gatter hép dètten titj vurbéj vlie:cht, geniet ik ècht van èlleke menutj. Wa is 't tòch sjòn um ens enne kieër de prins te zin...
'ne Kick-start mi goejje meziek, veuróp in ’t Kieveloeëteriek!
Prins Jarno I
Prinselééve dél: 15
De leeste daach vur de Vastelaovend
't Gé nòw dan ÈCHT beginne. We beginne de fienaalewéék van min prinsesjap mi 't Internationaal Prinsetreffe in Remeunt. Mi 'n èntal (aaw-)Kieveloeëters ginge we die kant óp um óns hier ók wér de oeëge utj te kie:ke nò alle ander prinse, prinsèsse, èn al wa dòrtusse zit.
Vurdè we ècht de zaal in ginge, kwaam der enne verklédde mèns mi 'n mómbakkes méj tegemoet. Ik daacht: ennen dèùrepsgèk die ieddere prins kéént èn mi iedderieën óppe footoo wil. Óp 't mómènt dè ik dè daacht, vat héj enne cd mi enne èchte Le Sjief-stikker utj zin bóksetès. Héj wil géér 'n hanttieëkening. Óndangs dè ik nòch óp min Le Sjief-hanttieëkening moet oeffene, waar héj as 'n weecht zò blééj. Óp 'n gegééve mómènt drèèjtjie zich eum èn ónthultjie zinéjge as enne waare Masked Singer. Wie zaat der ónder 't mómbakkes? Danny Flipsen. Zin jèùrege vriendin Brenda stóng aachter 'n muurke te filleme hoe wéj óppernééj verrast woore. Suupperleuk dè géllie derbéj waare.
De dónderdich veur de Vastelaovend stóng der nòch 'n bezuu:k èn 't Roëd Gael & Greunriek (Groenrijk Maasbree, wèèrek van Lisa) geplènt. Toe we binnekwaame woore we hartelek óntvange dur de kòlleegaas van Lisa. Nao 'n sjòn wèlkómstwoort van wérkgééver Frank Vaessen övverhandichde de kòlleegaas 'n sjòn kedoo èn Lisa èn méj. 'n Haangtòffel mi 'n footoo van óns deróp! Óndangs 't beest wal kónfrònteerent waar, waare we netuurlek hél kóntènt mi di sjòn kedoo. Groenrijk, dangke vur 't leuke bezuu:k èn òllie kòlleegiejallietéjt.
Vervòlleges ginge we dur nò verzèùregingstehusj Sint Jozef. Vur méj 'n spésjaal bezuu:k, want hier wérrekt naamelek tante Mien. Tante Mien, die nò 'n ruu:regen titj 'n óndersjééjing van méj haa verdie:nt. Spésjaal um dè mómènt mee te maage maake. 't Applòws van alle kòlleegaas van Sint Jozef gaf méj hénnevèl. Nò di òffiesjeel mómènt waar 't titj um éfkes te buurte èn utjeraart de póllónééze te loeëpe. Leuk èn biezónder um ók hier óp bezuu:k te maage.
Óndertusse waar 't wér titj um richting de Heere van Meijel te gao. Dòr han min kòlleegaas nòch ennen bòrrel geplènt um nòch énne kieër veur de Vastelaovend saame 't glas te höffe èn mekaar enne sjònnen titj te wènse.
Veul titj waar der nie, want Lisa èn ik ginge éffe béj óns pap èn mam tusj ééte. Ze wòn nòch énne kieër veurdè te dréj daach lósbarste, saame wa ééte. Toe we émmel dòr waare, bleek 't héllemòl nie um 't ééte te gao. Ze han 'n biezónder kedoo vur óns laote maake èn dè wòn ze óns övverhandigge. Lisa èn ik kreege allebééj 'n spèltje in de vèùrem van enne Kievel. Béj méj sté middenin de Kievel 'n mezieknoot èn béj Lisa sté der 'n bluumke. Suuppervèt kedoo wa we hél laang mi gröts gòn draage.
De dónderdich woor afgesloote óp 't industrieteréjn. Dòr waar 't waagereechte van de Kéjsjeut. Dòr waar ik saame mi vòrst Ron, atjuudant Mark èn Lisa vur utjgenöt. We han de deur aachter óns nòch nie éns deechtgedao, òf de ganse Kéjsjeut rie:p me al de waagen óp. Groeët geliek, die waage moos ók goe ingevéért wéére. Toe ik émmel gans nò boove waar geklómme, moos ik wér nò ónder kómme van Anita Kessels. Toe ik naamelek zeestien jaor geléjje zèèlef Kéjsjeuteprins waar, han we de töjnversie:ring gemakt. Die töjnversie:ring bestóng ónder andere utj 'n groeëte roeëj, géél èn gruu:ne steek. We hébbe toe besloote um de töjnversie:ring te sjingke èn de Kéjsjeut zòdè die béj de vòllegende prinse èn prinsèsse gebruukt koosse wéére. Dè hébbe ze behuuërlek goe vólgehaawe, want zeestien jaor witjer krich ich dizze steek wér truch mi aachteróp alle naame van de prinse èn prinsèssie die der in de tussentitj geweest zin. Sjòn dè we dizze Kievel ók wér rónt hébbe gemakt. Kéjsjeut, dangke vur de leuke verrassing èn de leuken aovent.
'ne Kick-start mi goejje meziek, veuróp in ’t Kieveloeëteriek!
Prins Jarno I
Prinselééve dél: 14
't Wiekkènt veur de Vastelaovend
De ganse wéék zaat bómvól mi vergadderinge, pótkaastópnaames, rippetiessies (vur dè wòr ik nòw nòch niks övver kan zégge) èn ander tóffe mómènte. In di dél van min prinselééve vertél ik övver 't wiekkènt èn de wéék veur de Vastelaovend.
Dónderdich 1 fibberwarrie moos ik vur vòrst Ron vréjhaawe. Latter bleek dè óp dizzen aovent de krantekemissie méj de uurste Kievelkrant kwaam övverhandigge. Ik waar óntzittent benééjt nò alle verhaole, want ik wees dè ze wa kammerèùj han gesprooke um wa verhaole van méj lós te peutere. Èn mi Roel Peeters as lit van de krantekemissie, weeste ze mieër övver méj dan minéjge lief is.
Ze kwaame tradiessiegetròw binne mi 'n uuniek kedoo; dè wòr mèr ieën èksemplaar van is, naamelek min prooklemaasie. Sjòn ingelisjt. Zò wie Bart Verstappe dè sjòn zee: “Dees wil iedder prins in zin husj hébbe hange.” Héj hi al 'n sjòn plèkske gekrigge.
Dernao krich ik de uurste krant övverhandicht èn blaarde we dur de sjòn verhaole èn footoos hin. Hél sjòn um te lééze wa ze allemòl övver méj te weete zin gekómme. Ók hél sjòn dè ze in aaw footoobuu:k zin gedooke um dòr wa aaw footoos utj te haale.
Zòtterdich 3 fibberwarrie ginge we smèèrges de krant verkoeëpe. Leuk um te doe:, zeeker as ge zèèlef óp de veurpaagienaa stòt! Veul titj waar der nie, want we mooste richting Vènloo um óppe footoo te gao mi alle prinse utje reegiejoo Vènloo. Óndangs veul bekéénde gezeechte, hébbe we ók ónze oeëge utjgekeeke nò de mést gèkke steeke èn prinsepèk.
Dernao han we 'n kléénj gatje óppe plènnning. Krèk titj zat um éfkes nééve Boscafé de Grens te gao. Hier wéére dizze middich pólsbèntjes vur de Zoepkoel utjgedélt. Óp utjnöddeging van alle nòbbers utje buurt gevraocht um ur husj te versie:re. We waare gevraocht um as zjuurie enne prisjwinnaar utj te roe:pe. Winnaar Leny waar óntzittent verieërt dè ze gewónne haa. Leny, mi zòn sjòn kievelmènneke hérre géj dizze pris harstikke verdient!
Gòw wér witjer nò 't vòllegende adrès: Patrick Verstappen. Dòr ginge we 't Frètske óphaale. 't Frètske wért óp de vastelaovesdinzich utjgeréjkt èn de vastelaovesvierder. Tradiessiegetròw wért nao 't verkoeëpe van de krant 't Frètske béj de vastelaovesvierder van furrech jaor ópgehalt. Leuk um éffe mi Patrick te buurte. Zeeker umdètjie min boekkinge die ik béj de Heere haa stao, allemòl övvernimt. Klasse Patrick èn dangkewèl!
Saoves han we de heersers van de Kéjsjeut èn de Véngneuze utjgenöt um mi óns nò 't Pannekoekkehusj te gao. Éfkes vur de ‘teambuilding’. Dè we 'n tie:m zin, waar al goe te mérreke. 't Waar óntzittent gezèllich èn we hébbe mekaar nòch wa bétterder lieëre kénne.
Alwér 'n sjòn wiekkènt!
'ne Kick-start mi goejje meziek, veuróp in ’t Kieveloeëteriek!
Prins Jarno I
Prinselééve dél: 13
Lèkker kwééke
Nao enne ónvergéételeke Bónte Aovend èn aafterpaartie béj óns tusj, wéér ik wakker. Ik fris me éffe óp ónder de doesj, ik éét me wa, doe: min prinsepak èn, èn 't is wér titj um nò D'n Binger te gao. Tis titj vur de Kééj Knappe Kwéékmiddich.
Toe ik Kéjsjeuteprins waar, woor ik utjgeroe:pe in de pòwze van de Kééj Knappe Kwéékmiddich. Inmiddels hi 't utjroe:pe van de nééj Kéjsjeut 'n éjge mómènt gekrigge óp 't Kéjsjeutebal. Dè betieëkent dus enne middich derbéj wa in 't tieëken sté van de baazessjooljeucht.
Dè èntoezjasme hébbe de wichter vandaach ók wér béj. Den énne nòch zinnewèèchtigger as den ander, mèr ik zie: dè ze allemòl ie:verich ur lietje veurdraage. Óp 'n gegééve mómènt wéér ik getipt dè ik ók mee 't poodiejum óp moet, want de sjutterééj hi zich ók wir béjén gevat um ur lietje te zinge. Ik mèlt méj aachterin de zaal. Èn ik krie:ch, dur ieën van de leeje, 'n éjge geknutselde tambour-maîtrestèk in de haant gedòwt. Ik mach veuróp um de joong nòr 't poodiejum te dirriegeere. Suupperleuk dè géllie òllie ók vur di mómènt wir béjén gevat hébbe.
't Sjònste van prins zin, is dè ge 'n èntal mènse maacht óndersjééje. Ge maacht teege die mènse zégge wörrum ge zò wardeert. Óp dizze middich hép ik gekózze um Brenda van Rooij te óndersjééje. Ze betieëkent veul vur óns èn ze leevert 'n groeëte béjdraage èn de Méélse geménjsjap; in de vèùrem van 't Kinjer OLS. Hartstikke verdient Brenda! Dangke veur alles!
Nééve alle délneemers geniet ik ók óntiechelek van alle ander jeucht. Der óntstao fantastiesse mómènte: Op 'n gegééve mómènt kumt veurzitter René mi zin buurméjtje nò me toe. Ik hèrkén ur nòch van min bezuu:k èn joenit 3, wòr ze méj mèr blif knoe:vele. Ze géft méj ur vriendebuukske èn wil géér dè ik dòrrin sjrie:f. Woe de jeucht mi òw beezich is, ving ik suupperspésjaal, dè wéént zeeker nie.
As ik èn 't énjtj van de middich perbeer van 't poodiejum af te glippe, wéér ik dur de Kéjsjeut èn de Véngneuze wér hél gòw truchgeroe:pe. Ze wille géér saame mi méj 'n fésje bòwwe óp 't poodiejum. Utjeraard maak ik dè ik wér gòw óp 't poodiejum stao.
Muu:ch, mèr zónder mieër vóldao slutje we de middich èn aovent af mi frietjes èn 't leeste pilske van 't wiekkènt.
'ne Kick-start mi goejje meziek, veuróp in ’t Kieveloeëteriek!
Prins Jarno I
Prinselééve dél: 12
Enne ónvergéételeken dach
Zòtterdiggemèèrge 27 jannewarrie, we zin dur de Awt Prinse utjgenöt um béj de ónòffiesjeele oopening van 't Aaw Prinsebós ènweezich te zin. Saame mi vòrst Ron èn atjuudant Mark moocht ik den appelbòm vur de Kieveloeët plante. Vervòlleges moochte de Véngneuze, Kéjsjeut, Aaw Prinse èn Medelo Narragoniam ók 'n toepasseleke bòm plante. De kómmenden titj gòn ze witjer um vur ieddere aawe prins ennen bòm te plante. Èn as ik dòr straks ók béj huu:r, krie:ch ik ók ennen éjgen bòm. Óndangs ik nòch laang nie èn aftreeje dingk, ving ik 't wal 'n sjòn gegévve dètter strakkes 'n léévende plats is um truch te dingke èn dizze prachtiggen titj.
Èn dan brékt wér 't vòllegende hòchtepunt èn: De Bónte Aovend. As veurberéjding kómme Ron èn Mark béj óns ééte èn we gòn vervòlleges gezaamelek richting D'n Binger. Sins furrech jaor is 't tradiessie um alle leeje mi tietel (ieëreveurzitter, ieëreleeje, èn leeje van verdienste) te óntvange in de fójee. 'n Biezónder mómènt, want dan kannege krèk óntèlbaar veul jòrre Kievel-èrvaaring in de oeëge ènkie:ke. Ik ving 't ók sjòn um te zie: dè dees mènse, óndangs dè ze nie mér béj de verénneging zitte, tòch nòch óp veul Kievel-ivvenemènte ènweezich zin. Saame mi veurzitter René èn vòrst Ron mach ik ze éfkes toesprééke èn höffe wéj saame 't glas.
We han di biezónder mómènt hòst afgerónt toe wa peniek óntstóng. Atjuudant Mark woor wéchgeroe:pe èn ik zach ók mee `n èntal mènse deraachterèn gao. Ik haa uurst nie dur watter èn de hant waar, mèr éfkes latter huu:r ik dè ter 'n reeanniemaasie gònde is. Ik zie: èn alles èn iedderieën dè 't behuuërlek indruk hi gemakt. Ók óp méj. Gelukkich huu:re we gòw dè 't nòr umstandichheeje de goejje kant utjgé. Óndangs dè 't goe gé, mérrek ik èn min éjge dè ik éfkes den titj nöddich haa um di 'n plèkske te gééve èn de knóp eum te zitte. Umdè vur nie alle bezuu:kers mee döjdelek waar wa ter waar gebeurt, besloote we di te zégge in de vólle zaal. Gelukkich kooste we 'n geruststèllende bótsjap övverbrénge èn dòrbéj ónzen dangk utjsprééke richting de betrókkene die hél gòw èn ók tegoe:j hébbe gehandelt. 't Applòws watter toe ónstóng waar 'n sjòn mómènt, den aovent kan nòw ècht gòn beginne.
Der waare 'n hél èntal mènse die spésjaal vur méj gekómme waare. Nééve die mènse hép ik éfkes 'n reuntje gemakt um ze allemòl veul plezie:r te wènse èn te bedangke vur ur kómst. Sjòn um te zie: wie der allemòl vur méj zin.
't Prógramma gé beginne èn ik mach as prins aachter de dansmerietjes èn um in enne bómvólle zaal de Bónte Aovend te oopene. Dè waar al 'n prachtich mómènt. Ik stao tusse Mark èn Ron in, èn ik gun minéjge den titj um éns rustich te kie:ke wie der allemòl zin. Vervòlleges krie:ch ik 't woort vur de oopeningsspietsj. Ik mérrek dè ik tòch wal de zinnewe hép. Gelukkich gé alles goe èn krie:ch ik 'n sjòn applòws van zòn 450 man!
We gòn èn 't prógramma beginne èn ik mach óp de sjònste plèk van de ganse zaal gòn zitte. In 't midde, aachterin. Der sté 'n óptreeje óp 't prógramma die ik nie kén: De Freerunners. De naam verklapt wal dè Hidde ónderdél is van 't óptreeje, mèr toe Frits Berben as Spiderman 't poodiejum óp kwaam, han ze de ganse zaal al mee. Ècht prachtich um te zie: woe Hidde Frits kan naodoe: èn woe Frits heerlek béj zinéjge blieft. Óp 'n gegééve mómènt liekke de stèmme zòveul óp mekaar dè ge goe moet lusjtere wie der uubberhòwpt èn 't woort is. Sjòn dè géllie meedoet!
DE verrassing van den aovent zit in 't óptreeje van Spèùtj Éllef. 't Is óppernééj goe in mekaar gezit. Dè doe: ik zeeker nie nao! Óp 'n gegééve mómènt zie: ik 'n gruupke Bootcampers óp 't poodiejum kómme, èn vòrst Ron tikt méj èn: “Kiek dòr is ze tòch!” Ik moet éffe goe kie:ke, want ik haa tótaal nie verwaacht dè ze óp di poodiejum zao stao. Mèr dan zie ik min éjge Lisa as fitgirl dertusse stao. Suupperleuk dè ze di vur méj duu. Dè makt méj gröts.
Den aovent kumt hòst óp zin énjtj, mèr nie veurdè René Brummans & Geert de Leeuw min prinsenummer laote huuëre. Ik wees utj min vurrege bezuu:ke èn de Bónte Aovend dètter 'n prinsenummer gemakt wért. Mèr as dè nummer dan övver òwzèèlef gé, is dè wal 'n mómènt van besèf: Ik mach de prins van de Kieveloeët zin. Manne, sjòn gedao! Dè duu 'n prins goe!
Bónte Aovend 2024 woor afgesloote dur Don Kiesjot. Saame mi prins Fer, prinsès Indy, prins Teun èn prinsès Fleur hébbe we nòch maage geniette van de muuziekaalietéjt van dizze groep. Hier hébbe we den tènt nòch ens vakkundich óp de kóp gezit. As ge as prins dur die vólle réjje veuróp in de póllónééze maacht gao, dan vuu:lege òw ècht van tóp tòt tieën enne prins.
'ne Kick-start mi goejje meziek, veuróp in ’t Kieveloeëteriek!
Prins Jarno I
Prinselééve dél: 11
Óndertusse bén ik èn dél 11 beezich van min Prinselééve. Èn ik mérrek dè 't sjrie:ve van 't Prinselééve vur méj wérrekt as tirraapie. Sòms gebeurter mieër dè ge kaant besèffe èn téjdes 't sjrie:ve van dees stukskes, lukt 't méj um te besèffe hoe biezónder alles is. Èn jao, alles is biezónder, want alles hi zò zin sjarme. Groeëte dinge, mèr ók zeeker de kléénj dinge.
Téjdes 't Kéjsjeutebal mérrek ik dè ik goe övverwéch kan mi de jeucht, ‘Levelen’, mèr nie allieën lètterlek . Mèr vurral hél biezónder woe de jeucht teege òw ópkiekt. As ge dan éfkes de èndacht vur ze hét, dan zierrege ze lètterlek grèùje.
Mi di in minne aachterkóp, kie:k ik utj nò vréjdich 26 jannewarrie um én uurre. Ik hép naamelek 'n èntal brievve gekrigge van de lieërlinge van joenit 3. Òf ik éfkes langs wil kómme um vraoge te beantwoorde. Netuurlek wil ik dè, juf Bianca! (Die ik nòch kén van minnen titj óp Den Doelhof) Èn twé lieërlinge (Maddy & Robin) waachte méj béj den ingang óp um méj nò de klas te weezje. Nòdè ze méj 'n hallef uu:r 't hémt van 't lief hébbe gevraocht, gòn we mi zen alle óppe footoo. Mèr dè bliekt nie gemèkkelek, want ik wéér uurst van alle kante geknoe:velt.
Dezèllefden aovent wérter ók ópgebòwt vur de Bónte Aovend. Dòr wil ik géér min gezeecht laote zie:. Èn ik wil géér 'n bòrrelpekèt övverhandigge èn de Méélse artieste. Zéj hébbe naamelek wér veul innerzjie gestooke in 'n óptreeje èn dòrvur wil ik ze géér bedangke!
'ne Kick-start mi goejje meziek, veuróp in ’t Kieveloeëteriek!
Prins Jarno I
Prinselééve dél: 10
Van aaw tòt jóngk
Zóndich 21 jannewarrie, wér enne ónvergéételeken dach. We begooste den dach mi 'n bezuu:k èn min éjge oomaa Maas. Inmiddels hi ze enne prachtigge lééftitj van 9 kérre 11 jaor. Saame mi ónze pap, óns mam, Harwin, Sharon, vòrst Ron, atjuudant Mark èn kléjjingman Hidde ginge we richting Zömmere vur enne gezèlligge mèèrege. Die mèèrge moocht ik bekroone dur oomaa 'n óndersjéejing te gééve. Suuppersjòn um te maage doe: èn mee te maake.
Vervòlleges ginge we 'n sjòn breuchske maake van aaw nò jóngk. 't Prinsebal van de Kéjsjeut stóng naamelek óp de plènning. We ginge de heersers van 2024 kómpleet maake. Dè wòr ik énòrm nò utjkeek, umdè ik in 't jaor 2008 zèèlef Kéjsjeuteprins bén geweest.
Iedder jaor verzint de wérrekgroep wér 'n kréjatief èn spannent óptreeje um de prins, prinsès èn Rò van Éllef te ónthulle. Di jaor waar di in de vèùrem van Pokemon. Iedder lit waar verhult ónder 'n sjòn geknutselde Pokemon-kart. Mi de néjje prins as Pokemontrainer Ash lie:p ik hant in hant 'n reuntje dur de zaal um de spanning nòch wa èkstra óp te voe:re.
Utjéjndelek stónge alle nééj Kéjsjeuters óp 't poodiejum èn moocht ik ze ieën vur ieën ónthulle. Sjitterent um ur ènstéékeleke èntoezjasme te zie:. 't Hòchtepunt waar netuurlek vur de nééj heersers: prins Teun (Brummans) èn prinsès Fleur (Strijbos). Dees twieë stónge béj méj al óp min nètvlies, umdè ze al téjdes de vastelaoveslèsse al hél veul övver de Vastelaovend weeste.
Nòdè prins Teun èn prinsès Fleur urre toepasseleke spreuk hébbe ónthult, is 't titj vur 'n fésje. We loeëpe de uurste póllónéézes èn bòwwe 'n fésje óp 't poodiejum. Vannaf dè mómènt wit ik 't zeeker: We zin kómpleet èn zin der gans vérrich vur... Èn ik bén vérrich um mi dees tópheersers gas te gééve!
Den aovent woor afgesloote mi 'n aafterpaartie béj prinses Fleur tusj. Dòr zie: ik nie allieën de èntoezjaste Kéjsjeuters, mèr ók de grötse aawers. Sjòn um te zie:!
'ne Kick-start mi goejje meziek, veuróp in ’t Kieveloeëteriek!
Prins Jarno I
Prinselééve dél: 9
'n Roe:j verrassing
We han poost gekrigge wòrróp stóng dè we zòtterdich 20 jannewarrie vréj mooste haawe. Um 14.11 uurre mooste we in vól òrnaat vérrich stao um ópgepikt te wéére. Math & Conny Peeters reeje krèk óppentitj veur. Èn mee wéére we óppernééj geblindoekt. Nòdè we iedder zantpa van Méél èn umstreeke gezie: hébbe, kwaame we utjéjndelek utj béj Peelpavilioen Onze Stek.
Dòr lie:pe we, nòch steets geblindoekt, de póllónééze óp de kulthit ‘Ik wooj nie gaon’. Intusse vuu:lde ik de wèèrmte van de kachel, mèr ók van de ènweezichhétj van de Kieveloeët. We waare naamelek óp de jòrlekse Roeëjendach. Nòdè ik woor verrast mi sjòn kedoos, waar 't èn méj de beurt um iemmes te verrasse. As steun in de ruch hép ik dervur gekózze um Anouk Heijkers te óndersjééje. 'n Hél biezónder intiem èn émoosjeneel mómènt. Di zin de ónvergéételeke mómènte die ge as prins mi mekaar maacht maake.
Manne, dangkewèl vur de òrganiezaasie van dizze gezèlligge middich! Gröts um as prins van di sjòn klupke veuróp te maage gao.
'ne Kick-start mi goejje meziek, veuróp in ’t Kieveloeëteriek!
Prins Jarno I
Prinselééve dél: 8
Tòch nòch veur de klas
Toe ik as kléénj mènneke óp de baazessjool zaat, wao ik alzelééve sjoolméster wéére. Mèr toe ik me latternao ging verdie:pe in ópléjdinge èn enne meeloeëpdach mi méster Hidde haa gehat, hép ik méj tòch bedaacht.
Mèr vandaach, mòndich 8 jannewarrie, stóng ik dan tòch veur de klas um unit 7 èn 8 vastelaoveslès te gééve. Saame mi vòrst Ron, atjuudant Mark èn Rò van Éllef-leeje Sjoerd Strijbos èn Bram van Dijk kwaame we béjén béj Ron vur de leeste veurberéjdinge. In de veurberéjding óp dizzen dach woor méj gezi dè ik me moos veurstèlle èn de wichter, mèr dè ik éjgelek wal moos zèùrege vur wa interaksie. Ik beslutj um de wichter dréj vraoge övver méj te stèlle èn ik slutj min stukske af mi 't ènlieëre van 't dènske van ‘DE’ kraaker van di jaor: Van Lieshout & Arts. Hoewal dè dènske nie ècht zò moejlek is, is 't sjòn um te zie: dè de ganse klas meeduu.
Ik vraoch ók èn ieddere klas òf ze minne spreuk weete. In ieddere klas zit der dan wal énne béj die 'n dél wit, wees Fleur Strijbos (daochter van Kievelleeje Sjoerd èn Linda Strijbos) minne ganse spreuk in énne kieër óp te dreune. Dè is wa mi enne paplippel...
De lees woor witjer ingevult mi vraoge van de wichter, vraoge die wéj veurberéjt han èn afgesloote mi enne kwis.
In de pòwze kómme we Jeroen Stappers in de kentienne teege. Héj zit dòr pòwze te haawe èn hèrkéént méj mee. Ik hép naamelek 'n èntal jòrre mi Jeroen óppe baazessjool óppe klas gezééte. We gòn 'n töffelke witjeróp zitte èn Jeroen wil éjgelek lievver béj óns kómme zitte dan béj zin kòlleegaas. Óp 'n gegééve mómènt sjuu:ft Jeroen èn èn zitjie teege méj: “Jarno, ge hét enne gewèldigge spreuk!” Sjòn dè héj di teege méj zi. We slutje de pòwze af dur éfkes mi mekaar óppe footoo te gao.
'ne Kick-start mi goejje meziek, veuróp in ’t Kieveloeëteriek!
Prins Jarno I
Prinselééve dél: 7
Zóndiggemèèrge nao 't Prinsebal van de Véngneuze, bén ik gevraocht um méj um 10 uurre te mèlde óp de sjutterééj vur de néjaorsbòrrel. Vòlleges de tradiessie wéére óp de néjaorsbòrrel de juubielaarese van de sjutterééj gehuldicht. Èn 't toeval wil dè de uurste prins van ónze sjutterééj (Peter van Bree) juubielaares is. Dè waar vur veurzitter John van Rooij ènléjding um méj te vraoge ók dòr ènweezich te zin. Óndangs dè Lisa èn ik dees ènléjding nie gans vertròwwe, zégge we teege John dè we ènweezich zalle zin.
Vannaf 't mómènt dè John èn 't òffiesjeel gedélte van de huldeging wil beginne, kumt Brenda de zaal in loeëpe èn vat ze mee 't woort: “We hébbe di jaor 'n prins èn prinsès in óns midde, èn die wil ik nòw géér óntvoe:re. Dus Jarno èn Lisa, géllie maage de jas èn gòn doe:.” Óns veurgevuu:l woor bevèsticht, we doen ónze jas èn, èn we wéére mi blindoek in den òwtoo gezit. Brenda waar nie allieën, want urre vrient Danny waar der ók béj. Ze starte den òwtoo èn ik huu:r Danny zégge: “Brenda zit de navviegaasie mèr ens èn.” Ik vertròw der gén zak van èn ik perbeer te vòllege wòr we hinréjje. Mèr nao twé boochte bén ik al rats de wéch kwitj. 't Énnechste wa ik vuu:l is ennen drèmpel òf enne knik.
Naodè Danny duu asòf ie 'n bönke utj enne slachbòm moet haale, kómme we èn óp lókaasie. Danny hèllept Lisa mi veurzichtich nò binne, Brenda trékt me gewoon övver iedderen dörpel hin. We wéére in 'n ruumte gezit èn ónze jas woor utjgedao. Óp dè mómènt bedingk ik méj dè ik örges stao mi allemòl mènse um méj hin. Um ze èn 't lache te krie:ge, makte ik de ópmérking: “Oh, ze zin vandaach goe stil.” Jòmmergenóch haawe ze allemòl de kaake óp mekaar. Óp 'n gegééve mómènt mach de blindoek af èn zie: ik al óns kammerèùj stao. Suupper dè ók zéj óp enne zóndiggemèèrge utj bét zin gekómme um ennen dach vur óns te òrganiezeere. Naodè we 'n bietje bekómme zin van de dóllemansrit zi Lisa: “Wòr zin we éjgelek?” En ik weest mee: “We zin béj ónzen atjuudant Mark van Rooij.”
We beginne den dach mi 'n kóp soep, 'n bruuëtje èn enne kwis. Naodè 't team wòr ik in zaat de kwis gewónne haa, waar 't titj um nò de vòllegende lókaasie te gao, 't Kievelmènneke. Dòr moocht ik nòch wa zégge èn we dróngke enne Klopfer rónteum 't mènneke. Wa ik toe nòch nie weest, waar dè we de nééj óptòchtroette ginge loeëpe. Vanutj 't Kievelmènneke ginge we nééve Sint Jozef nò pap èn mam tusj. Dòr moocht ik 't prinsepak èndoe: èn moos ik min kammerèùj èn 't danse krie:ge. De roette lie:p dernao richting de Vanrail wòr ik binne 'n hallef uu:r twé Roeëj èn twé Blaow leeje moos reegele. Utjeraart lie:t de Kieveloeët méj nie in de steek èn han wéj zèèlefs nòch 'n paar menutje övver.
De leeste lókaasie waar béj de Heere van Meijel wòr wéj den dach afsloote. Naodè wéj de versie:ringe béj de Véngneuze (atjuudant Britt) gekeurt han, woore we keurich nètjes dur Brenda & Danny tusj afgezit. 'n Ónverwaachte langen dach die we apsóluut nie han wille misse.
'ne Kick-start mi goejje meziek, veuróp in ’t Kieveloeëteriek!
Prins Jarno I
Prinselééve dél: 6
Véngneuzebal
Óppe zòtterdich 6 fibberwarrie, den dach dè saoves de nééj Véngneuze utjgeroe:pe wéére, hi ók de buurt zich wér saamegevat um de rèst van de buurt te versie:re.
Ik ging éfkes enne frisse neus haale dur 'n reuntje te gòn wandele. Toe ik truch de straot inkwaam stónge övveral in de straot mènse die de buuëm, lantaarnpèùl èn ónzen töjn te versie:re. Die middich huu:r ik ze 'n paar kérre teegenén zégge: “Sjòn dè we mi de Vastelaovend wér mi zòveul dinger beezich zin.” Fentasties dè ik de ènléjding mach zin um versjillende mènse utje buurt wér béjén te brénge.
Den aovent vèèlt èn we gòn vanutj 't Kluphusj richting de Vangrail um de nééj Véngneuze utj te roe:pe. Toe we binnekwaame waar 't al behuuërlek druk èn ik vuu:lde de spanning. Ik waar hél èrrech benééjt wie der saame mi méj di jaor ging heerse övver 't Kieveloeëteriek. De spanning steech toe Ellen Janssen naames de Véngneuze de aovent oopende mi 't aftreeje van prinsès Robin èn vòrstin Joliena. Hél laang zitte de Véngneuze nie zónder vòrstin, want Ellen begeent mi 't utjroe:pe van vòrstin Jayla èn ur éjge daochter as atjuudant Britt.
Jayla èn Britt stèlle saame alle Rò van Éllef-leeje veur èn maake dur ‘Wie Ben Ik’ bekéént wie de prins & prinsès zin. Prinses Indy mach zich as uurste prizzenteere as de nééj prinsès. Dernao blie:ve der nòch 'n paar joong övver. Óp 't leest stòn Fer Vercoulen (enne zoon van Rob & Rian Vercoulen) èn Sam Strijbos (enne zoon van Sjoerd & Linda Strijbos) nòch óp 't poodiejum. Naodè vòrstin Jayla de leeste vraoch gestéélt hi, mach prins Fer zen éjge bekééntmaake as prins van de Véngneuze!
De néjje groep löt mee zie dè ze 't wal snappe woe 't vastelaovesfésje gevie:rt moet wéére. Éffe latter vat vòrst Ron 't woort èn mach ik de nééj prins & prinsès toesprééke. Ik gééf ze enne praktiesse tip woe ze van ur zinnewe af kanne kómme èn ik mach ze éfkes latter óndersjééje.
Der vòllechde enne gezèlliggen aovent wòr we saame 'n tópfésje gebòwt hébbe. Ik perbeer de nééj heersers af èn toe wa tips & triks te gééve um der nòch 'n gròtter fésje van te maake. Saame mi prins Fer èn den énne zééj, èn prinsès Indy èn den andere zééj, slutje we den aovent af óp de klangke van Lex Uiting.
We wéére utjgenöddicht um mi vòrst Ron, atjuudant Mark èn kléjjingman Hidde den aovent af te slutje boove in 't kémmerke. Naodè Hidde zin prootòkòl vur de vuu:t afgehandelt hi, kumt zin mésterleke kwallietéjt nò boove um de joong utj te légge woe wéj béj de Kieveloeët afslutje.
'ne Kick-start mi goejje meziek, veuróp in ’t Kieveloeëteriek!
Prins Jarno I
Prinselééve dél: 5
LVK èn P&M Liedjesfestival
Kieveloeëters èn Kieveloeëterinne.
De uurste aktievietéjt van 't nééj jaor is 't LVK. 't Bestuu:r van D'n Binger hi kóntakt gezoocht mi Stichting LVK èn L1 um gasthieër te maage zin vur de halleve finaales van 't LVK. Dè wòr ze méj as LVK-liefhébber 'n énòrm plezie:r mee doen. Dè ik hie:r ók nòch as prins hin mach gao is hél biezónder.
De uurste halleve finaale moocht ik as prins, saame mi vòrst Ron èn atjuudant Mark alle bezuu:kers èn artieste wèlkóm héétje in Méél. Dernao ginge we de zaal in um te geniette van de uurste twénjtjich halleve finaaliste. Enne suupperleuken aovent wòr we ‘DE’ kraaker van di séjzoen moochte zie: ‘Van Lieshout & Arts’.
Ók de vréjdich moochte we óp utjnöddeging van D'n Binger ènweezich zin béj de twédde halleve finaale. Béj de start van de middich moocht ik iedderieën van de verénneging óndersjééje mi min prinseplétje. Jòmmergenóch kooste we de twédde halleve finaale nie gans meemaake, umdè we richting 't P&M Liedjesfestival ginge.
Ók dòr keek ik óntzittent nòr utj. Nie allieën um de Kwéékers èn te moedigge, mèr ók um John Theeuwen, de óntwèèrper van 't prinseplétje (èn aaw-prins plus aaw-vòrst van de Beringse Kuus), te maage óndersjééje mi min prinseplétje. Naodè we dòr 'n sjòn mómènt van han gemakt, waar 't titj um de Kieveloeëtetradiessie óp 't P&M Liedjesfestival veurt te zitte. Naamelek: de prins van Méél moet as uurste óp 't poodiejum stao.
Wòr nòrmaal gesprooke Benny Vaes zèùrecht vur dees tradiessie, han atjuudant Mark èn ik di jaor 'n ander straategie. We han naamelek wa mieër prinseplétjes meegenómme. Ieën dòrvan wao ik hél géér gééve èn diezjee-kòlleega Rob van Soest, die al druk plétjes èn 't drèèje waar óp 't poodiejum. Dus Mark & ik stónge binne 'n ketie:r al óp 't poodiejum. Tradiessie is wér gelukt!
Naodètte winnaars van den aovent, de Propellors utj Hèldedèùrep, ur övverwinning gevie:rt han, stónge ze 't poodiejum wér af èn alle prinse van Pieël & Maas plus Néér. Leuk um de ander prinse èn prinsès te óntmoette èn saame 'n fésje te bòwwe. Dè fésje lach ók nòch éfkes in min haant, want óp 'n ónbewaakt mómènt stuu:rde 'n éntal leeje van de Rò van Éllef méj 't poodiejum óp. Stijn van Horssen èn Roy Jacobs loeëpe nò diezjee Rob van Soest èn zégge mi 'n knipoeëch: “We hébbe zèèlef ennen diezjee béj, hup èn de kant.” Rob èn ik kénne mekaar goe èn héj makt éfkes plats vur méj èn we drèèje saame nòch 'n èntal dikke vastelaovesplaate. Uuniek mómènt.
Óp 'n gegééve mómènt krie:ch ik 'n séjntje van de Kieveloeët dè 't titj is um van 't poodiejum af te kómme èn richting de bus te gao. Émmel truch in óns kluphusj mach ik nòch 'n paar sjòn weurt tòt de Kwéékers reechte èn wért der nòch 'n ècht Mééls fésje gevie:rt.
'ne Kick-start mi goejje meziek, veuróp in ’t Kieveloeëteriek!
Prins Jarno I
Prinselééve dél: 4
Dè wa ge nie èn ziet kómme: {ver·ras·sing}
Kieveloeëters èn kieveloeëterinne,
Óp 't moomènt van di sjrie:ve bén ik vóllóp ènt naogeniette van enne wéék die nie gans vòlleges de plènning lie:p. Tans nie vòlleges min plènning.
Zòtterdich 16 dizzèmber vóng ónze jòrlekse féstaovent van de sjutterééj plats. Ik haa 'n paar wééke geléjje wal 'n utjnöddeging in de meel gezie:, mèr érlek gezi waar 't méj allemòl 'n bietje óntsjoote. Dus ik haa óns nie ópgegévve um dòrhin te gao. Toe krich ik 'n èpke van Mike Beckers: “Jarno, ik zuu:k éjgelek nòch ennen diezjee vur de féstaovent. Is dè wa vur òw?” Ik daacht: “Verrèk jao, dè is kómmende wéék zòtterdich!”. “Priemaa, ik wil wal drèèje óp de féstaovent.”
In de tussentitj waar ik zèèlef ók mi 'n verrassing beezich, want téjdes 't prinsebal krich ik 'n sirrenaade van de sjutterééj èn dòr wao ik ze nòch géér vur bedangke. Spésjaal vur de sjutterééj (èn kòlleegaas) haa ik paar doeëze prinsegebèkskes bestéélt um as bedangkje te trakteere. Puu:r toeval, gao ik de mòndich veur de féstaovent mi die gebèkskes nò de sjutterééj. Dòr wòr ik al 'n paar mónt nie mér gewees bén. Um der zeeker van te zin dè Brenda ènweezich waar, haa ik ur veurzichtich 'n èpke gestuu:rt. Aachteraf waar dè de rèdding vur de sjutterééj, want in 't kluplókaal laage de 'tamboer-maître’stèk, die de joong leeje vur méj èn 't knutsele waare. Dè moos netuurlek allemòl éfkes verstópt wéére.
Truch nòr zòtterdich de 16de. Wéj han óns utjéjndelek tòch ópgegévve vur de féstaovent, mèr we wòn uurst nòr de Truckrun in Beeringe gòn kie:ke. Dòr din naamelek de vrachwaages van minne sjònvaader èn mee. Èn in ieën van die vrachwaages zao minne sjònbruu:r vur de uurste kieër meeréjje. Dè wilde we netuurlek wal éfkes zie:. Mèr hélaas paaste dees plènning nie in de plènning van de sjutterééj.
't Waar èn Brenda de taak um derveur te zèùrege dè ik um 18.30 uurre béj de sjutterééj zao zin. Um dè veur mekaar te krie:ge haa Brenda wa bedaacht. Ze stuu:rde méj óppe zòtterdiggemèèrge 'n èpke òf ik nie tòch wa érre koos kómme, want die joong han belooft dè ik zao drèèje èn der mooste 'n paar ók wér óppentitj óp bét ligge. Umdè Brenda wal dikker, éjgelek alzelééve, dinger óp 't leeste moomènt reegelt, waar ik nie verbaast övver di verzuu:k. Verbaast waar ók nie de goe:j émoosie. Ik waar érre geierrieteert, want ik waar nie bepòlt van plan um min éjgeste plènning ópzééj te zitte. De smoes um méj wa érre béj de sjutterééj te krie:ge, koos dus den drèksbak in.
Plan B begoos dan wal óp ónzen óprit. Wéj zòn nòr de Truckrun gao, mèr óp 't moomènt dè we den òwtoo instappe zee Lisa: “Ik réj wal.” Dè wa ik ur nòch nòjt hép huu:re zégge... dus ik zéch: “Wòr gòn we hin?”. Dòr krich ik nie ècht 'n fetsoenlek antwoort óp. We vertrékke èn wòr we éjgelek rèchsaf richting Beeringe moosse, slé ze lingsaf richting de sjutterééj. Utjéjndelek kóm ik béj de sjutterééj binne èn duu iedderieën asòf ter niks èn de hant is.
Inmiddels loeëp ik mieër as 'n uu:r béj de sjutterééj zónder dè ik wit wa ter gé gebeure. Óp 'n gegééve moomènt ruupt veurzitter John van Rooij méj. Héj wil 'n lietje drèèje óp min drèèjtòffel mèr wit nie hoe dè moet. Héj zi: “Kannege wa fésteleks ópzitte?” Ik ‘scroll’ dur min mappe èn béj de map "Carnaval” zi John: “Heej dòr zal wal wa sjòns tusse stao!” Ik moet van em die plaat instarte èn zi: “Kiek mèr wa ter gebeurt...” Ik start Pruuf Mar in èn drèk dernao huu:r ik enne bekéénde stèm zégge: “Kieveloeëters èn
Kieveloeëterinne”. Èn dòr kwaame vòrst Ron èn atjuudant Mark èn 'n groeëte déllegaasie van de Kieveloeët binne. 'n Tootaal ónverwaachte verrassing.
Naodè ik me hép umgeklét, min wórrechheeje wér gekriggen hép, mach ik as prins truch óns kluphusj in. Suupperspésjaal um as prins in òw éjge kluphusj te stao. Dernao mach ik 't woort reechte nòr de leeje van de sjutterééj èn vertél ik ze wèlleke smoezze allemòl gebruukt zin um méj óp de féstaovent te krie:ge.
Dernao start 't prógramma wa de sjutterééj in mekaar gesluttelt hi. Dè begeent mi 'n verrassing van alle joong leeje. Die han allemòl enne éjge ‘tamboer-maître’stèk gemakt die ze strak in de maot, mi de groet èn méj derbéj, kwaame prizzenteere. Leuk um te zie: dè die joong geniette van enne prins in de verénneging. Dernao kwaame de leeje die han meegedao èn de Liedjesaovend de zaal in èn zónge zéj nòch es ur lietje.
As leeste ónderdél van 't prógramma haa de sjutterééj 'n Kievelmènneke van piepsjuum. Zòas we dè béj de kunning mi den haan doe:, ginge we nòw 't Kievelmènneke dervan afsjie:te. Naodè de nöddege keugel gelóst woore, hing 't Kievelmènneke der behuuërlek lósjes béj. Ik lee nòch énne kieër èn, vat em óp 't mést kwètsbaare punt èn haal den trèkker övver. Méj as onfortuinlijke sjutter (léés: iemmes die hòst nòjt sjie:t) sjie:t 't Kievelmènneke nòr ónder hin. Ik dingk dè 't beginnersgeluk is.
Nao de nöddigge póllónéézes kumt ók dizzen aovent óp zin énjtj èn gòn we nò husj. Tusj èngekómme hébbe twé ie:vere aawers alle ‘tamboer-maître’stèk van de joong leeje in den töjn gestooke. Stiekkem tòch wal 'n bietje gröts is 't vur óns titj um nò bét te gao.
Mi zòn fentastiesse verrassing aachter de ruch dingk ik: “Dè waar em vur di jaor. In 2024 gòn we der wér vólle bak teegenèn.” Nòw... dan kénnege de Kieveloeët nòch nie.
Dónderdich 21 dizzèmber waar ónze jòrlekse kórsbòrrel óp 't wèèrek. Dè wa alzelééve begeent mi 'n prizzentaasie övver 't afgeloeëpe jaor. Dernao 'n dienee èn afgesloote mi 'n fésje. Vur dè fésje haa Willie gevraocht òf ik saame mi ennen andere kòlleega meziek wao drèèje. Nòw, zòas ge mesjiens al mérrekt bén ik aaltitj wal te pórre vur 'n leuke boekking. Zò gezi, zò gedao. Ik haa minne vaaste lévveransie:r (van min diezjee-sets) laote weete dè héj 'n sètje nò Méél moos kómme brénge.
Toe ik ènkwaam béj Goejje, wòr de kórsbòrrel waar, vie:l méj wa óp. De laage twé èkstra miekrefoons die ik nie gereegelt haa. Èngezie: 't prógramma van de kórsbòrrel iedder jaor 'n verrassing is, daacht ik: “Willie zal wal wa gereegelt hébbe, mèr 't zal de Kieveloeët nie zin, want die zin zòtterdich al béj de sjutterééj geweest.
Ik begin gewoon mi drèèje èn de sfeer zit der éjgelek al gòw in. Ik bén óndertusse zòn dréj ketie:r èn 't drèèje óp 't moomènt dè Willie mi Lisa nò binne kumt. Toe ik Lisa zach wees ik krèk woelaat 't waar. Ik start enne buuttemars in, èn jao huur. Dòr kumt vòrst Ron netuurlek mi 'n groeëte déllegaasie van de Kieveloeët binne. Fentasties um te zie: détter zòveul leeje 'n gatje in de dizzèmberdrukte gevónge hébbe um der tòch béj te kanne zin.
Ik wéér meegenómme nòr aachter hin um méj um te trékke èn ik krie:ch van Hidde wér de steek, mantel èn sèpter. We doen 'n kórte veurberéjding óp wa we gòn zégge, èn nie veul latter stao ik as prins tusse al min kòlleegaas. Ók dè waar 'n fentasties moomènt. Naodè Ron óntiechlek sjèèrep utjen hoe:k kwaam (harrege béj moette zin), gaf ie méj 't woort. Ik vuu:lde dè di UT moomènt waar um min kòlleegaas vur 'n èntal dinger te bedangke.
Dernao ging de regie truch nò Willie hin die 'n prógramma in mekaar haa gezit. 't Prógramma begoos mi 'n lietje wa de kòllegaas vur méj han gemakt. Óp den tèkst van Monique Smit – Twijfelaar han ze enne toepasseleken tèkst gemakt: “Is 't ja or no? Dè bleek 'ne go! Prins Jarno tis ècht waor. In 't sjònne Méél gétjie veuróp. Dè wért enne hit, ja or no. Ja sowieso!”
We loeëpe enne póllónééze óp 't nummer èn ik zie: Andy & Roy aachter in de zaal stao. Dè wa ik as LVK-liefhèbber wal kan wardeere. Willie kumt nie veul latter nòr me toe èn zi: “Ze zin der vérrich vur. As géj ze ènkóndicht dan kanne ze mee beginne.” Prima, kumt goe. Mèr ik bén zò ènt geniette van kòlleegaas um méj hin dètter 4 nummer övverhin gòn, veurdè enne kòlleega teege méj zi: “Hoelaat beginne Andy & Roy?” Òchjao, die moos ik zèèlef ènkóndigge.
't Fentastiesse óptreeje van Andy & Roy kumt óp zin énjtj èn ik zie: de vòllegende Limburger binnekómme: Big Benny. Óppernééj kómpleet verrast! Wa Big Benny mi min kòlleegaas duu is vakmansjap. De ganse zaal gé óppe kóp, iedderieën duu mee. Zèèlefs de mènse die in 't kefee zitte béj Goejje zien de póllónééze vurbéjkómme.
Den aovent kumt langksaam óp zin énjtj èn ik geniet van iedderieën die éffe enne knoe:vel kómme gééve èn méj bedangke vur de ónvergéételeken aovent.
We zin pas nèt begoos, mèr ik wit én ding zeeker: “We zin mi 'ne Kick-start begoos!”
'ne kick-start mi goejje meziek, veuróp in ’t Kieveloeëteriek!
Prins Jarno I
Prinselééve dél: 3
Kieveloeëters èn kieveloeëterinne,
Zòtterdich 9 dizzèmber stóng den aovent mi de Ulewappers utje Nirkant óppe plènning. Di ivvenemènt is furrech jaor óntstao óp utjnöddeging van de Ulewappers. Di jaor waar de beurt èn óns um de Nirkantse Karnevalsverénneging övver de Limburrechse grèns te trékke. Dè bleek al 'n hél utjdaaging.
Éfkes veuraf hép ik kléjjingman Hidde gevraocht nò 't prógramma wòr ik me óp moet veurberéjde. Hélaas zaat Hidde ók in de kemissie èn lie:t dus nie al teveul lós. Nòwjè dan lòt ik me mèr verrasse.
Nao de nöddege vertraaging óppe grèns tusse Nirkant èn Méél, kwaame Prins Rob I & Prinsès Joyce binne. Naodè ik ze wèlkóm hép gehéétje in de Vangrail, waar de uurste vraoch: “Wa wittegéllie al van dizzen aovent?”. Ur veurkénnis waar nèt zò wénnich as óns veurkénnis.
Dòrróp kwaam 'n hérlek ónbezónnen aovent die óp luudiekke menie:r woor geprizzenteert dur de bruu:rs Vaes. Téjdes de versjillende ‘battles’ hébbe we alles in de stréjt gegòjt um dervur te zèùrege dè de punte in Méél bleeve. Dè bleek utjéjndelek ók nie zónder rizzeltaat, want de winst waar vur de Kieveloeët.
't Prógramma woor afgesloote mi 'n -verrassings-óptreeje van Lòt em Loeëpe. De verrassing waar der al 'n kléénj bietje vannaf, umdè ze al de gansen aovent in 'n huukske van de Vangrail ur ‘stèmbande’ èn 't oeffene waare.
Den aovent kumt óp zin énjtj èn we nöddigge prins Rob, prinsès Joyce, vòrst Cor èn atjuudant Lars utj óp 't kémmerke um te laote zie: hoe wéj tradiesjeneel óns aovende afslutje.
'ne kick-start mi goejje meziek, veuróp in ’t Kieveloeëteriek!
Prins Jarno I
Prinselééve dél: 2
Kieveloeëters èn kieveloeëterinne,
Deechter béj minne spreuk gé 't nie kómme. De uurste aktievietéjt as prins van de Kieveloeët: de Liedjesaovend. Ik hép énòrm utjgekeeke nò dees aktievietéjt, want óp dizzen aovent huu:re we wa de néjje sjlaager wért van di séjzoen. Mi min passie vur meziek èn drèèje téjdes de Vastelaovend, bén ik hél benééjt wa alle Méélse artieste óp den bant hébbe gekrigge.
In die daach dòrveur huuër ik van versjillende mènse, die de nummers al gehuu:rt hébbe, dè 't nievoo óntiechlek hòch is. Dè zèùrecht derveur dè ik nòch mieër zin hép in dizzen aovent èn nie kan waachte wiesdè ik nummers mach huu:re.
Naodè ik mi vòrst Ron den aovent hép maage oopene, waar 't dan zòwitj dè 't spits dur de Klèpbókse woor afgebeete. De lat woor mee hòch geli. Die lat hi ieddere groep óp ur éjge menie:r steets 'n bietje hògger geli.
Zónder andere tekórt te doe:, wil ik vanutj dees plèk de sjutterééj tòch bedangke vur ur fantastiesse délnaame èn de Liedjesaovend. Zónder dè ze 't weeste dè ik prins zao wéére, zaate der 'n èntal sjitterende verweezjinge in de tèkst.
“Béj de sjutterééj löpt de tamboe:rméétre veuróp,
Mèr wa duu ónze prins di nòw tóp.
Hòsse èn féste jao niks is te gèk, èn we gòn nie nòr husj, dis de plèk.
Dè wit dè vergééve we òw, wéj stòn òw géér béj in 't blaow.”
Nao 'n zwaor zjuurie övverléch kwaame de Kwéékers mi ur nummer ‘In de wòlleke mi òw’ as winnaar utje bus. Suupper um te zie: wa de winst mi ur duu èn nòch sjònner um te zie: woe deecht ze béj urzèèlef zin geblivve. Asòf dè ge twénjtjich jaor geléjje de cd in de cd-speuler dòwt èn dè di nummer der dan utjkumt. Dè di dur de zjuurie (èn délneemerszjuurie) wért gewardeert is 'n groeët kómpliemènt.
De prizzentaasieprisj, 't Duumke, ging nòr de néjje groep Lòt em Loeëpe. De kammerèùj van minne bruu:r Harwin èn zin vriendin Melissa. Héj zao éjgelek nie meedoe: mèr koos nòw netuurlek nie mér aachterblie:ve. Lòt em Loeëpe haa 'n prachtigge ròl vur Harwin in gedachte: prins van de wèèreme bèkkers! Naodè ik em zinnen éjge sèpter, 'n vèrs stókbroeët, haa övverhandicht, zitte dizze néjje groep de Vangrail in zin gehieël óppe kóp. Echt wal enne terèchte winnaar van 't Duumke!
't Leeste kómpliemènt is vur alle délneemers. Wéj maage suuppergröts zin dè ónze Liedjesaovend grèùjt; dòr zin hél veul dèùrepe (èn steeje) hél èrrech jaloe:rs óp!
'ne Kick-start mi goejje meziek, veuróp in ’t Kieveloeëteriek
Prins Jarno I
Prinselééve dél: 1
Kieveloeëters èn kieveloeëterinne,
Ik hép al versjillende kérre de Vastelaovend óp 11 noovèmber geoopent, mèr 11-11-23 zal ik nòjt mér vergééte. Den dach begoos hél rustich. Lisa èn ik hébbe wies 19.30 uurre de 11devande11de óp L1 gekeeke; um ’n bietje in de stèmming te kómme, mèr vurral um den titj vurbéj te laote gao. Èn mèr waachte wiesdè we nòr de Heere kooste. Tussendör zin we nòch éfkes in Deurze bótsjappe gòn doe:, zòdè niemmes in Méél óns mi dréj groeëte stukke ‘cake’ nò butje zaage loeëpe. We wòn naamelek wa in husj hébbe veur spòntaan bezuu:k.
Óp ’t moomènt dè ik nòr de Heere ging, huuërde ik minne veurganger Erwin I nòch zin allerleeste weurt in de zaal utjsprééke. Ik vóng ’t wa lómp um vieja de keuke de zaal in te loeëpe, dörrum bén ik mèr dur ’t kefee nò binne gegao. Dè is éjgelek wa ik van tevurre al bedaacht haa um juus nie te doe: um zò min meugelek mènse teege te kómme.
De uurste die ik teegekwaam, Dorien, stóng óp ’t punt um nò husj hin te gao. Mèr as ik prins zao wéére, dan zao ze nòch éffe blie:ve. Ik zéch: “Dan dringk der nòch mèr énne. Maarten, die èn ’t wèèrek waar, zach tòch wa zinnewe in min gezeecht. Héj haa èn twé weurt zat, um de uurste spanning béj méj wéch te neeme: “Jarno, pilske?”
Toe Erwin zin afsjéjt klaor was, wees ik nie woe gòw ik nòr min ‘comfortzone’ moos gao: “Lèkker véjlech aachter min drèèjtòffel!” ’t Uurste òffiesjeel gedélte begoos; Prins Erwin I sprak dan ècht zin leeste weurt èn de awt prinse héétje ur ‘groentje’ wèlkóm mi de nöddege tèsnuzzekskes. De ónthullingsèkt, wòr ik alle ‘tunes’ èn meziek veur moos instarte, ging beginne. Óp dè moomènt waar ik éjgelek wal óp min gemak èn waar ik gewoon min ding èn ’t doe:. Óp ’t moomènt dètte kóp van OLS-maskòtte WillUM langksaam dur vòrst Ron èn atjuudant Mark umhòch woort getilt daacht ik: “Shit, ’t gé nòw ècht gebeure!” Min hartslach steech zò gòw as de spanning in de zaal, want vòlleges minne èp haa ik um 21.11 uurre ’n hartslach van 160. Èn toe kwaam vòrst Ron mi de verlóssende weurt: “De néjje heerser van 2024 is nie dizze, mèr Jarno Schijven!!” Alle spanning verdween as snöw vur de zoon èn ik huuërde van versjillende mènse die rie:pe: “ZIERREGE WAL, IK ZEE ’T ÒW TÒCH!”
Krèk naodè wéj óns éffe truch han getrókke um de femiellie te bèlle, kwaame Lisa èn ik truch óp ’t poodiejum. De uurste die ik zach, waar ieën van min kammerèùj; Bart Tulkens. Zónder wa te zégge, koos ik èn em aflééze wa héj daacht: “Wa bénne géj nòw èn ’t doe:”.
Naodè ik alle ‘waardechheeje’ haa gekrigge, moocht ik min uurste weurt haawe èn de spreuk ónthulle. Ópgeleucht èn al dè tè goe ging èn dè we kooste gòn geniette van de flingke rééj èn mènse die óns géér wille kómme filliesieteere. Sòmmigge han zèèlefs de wéékelekse hòbbie van de zòndiggemèèrge ópzééj gezit.
Nao de resèpsie moochte wéj ’n fésje gòn baawe mi femiellie, kammerèùj, kòlleegaas èn de rèst van Méél. Enne fentastiesse aovent wòr we eenòrm van genoote hébbe, èn die vurbéj waar nòch veurdè we ’t in de gatter han. Titj um de steek af te zitte èn mi de Kieveloeët, Goe Gehusseld, kammerèùj èn femiellie óp husj èn te doe: um dòr nòch lèkker wa nao te buurte.
Zóndich nao ’t prinsebal ginge we nòch éffe de ‘dj’-spulle èn den òwtoo haale béj de Heere. Nao ’n tas kòffie mi Rudy èn Mark gedróngke te hébbe, waar ’t titj um de deur lós te maake, èn te kie:ke wie der allemòl spóntaan éfkes óp bezuu:k kwaam. Ók van die moomènte èn gesprèkke hébbe we énòrm genoote.
Dan is ’t wiekkènt vurbéj èn gòrrege nòr ’t wèèrek wòr òw kòlleegaas al ruum vie:r wééke beezich waare mi spikkeleere övver de prins. Ik mi de kóp van OLS-maskòtte WillUM ’t kentoeër binnegeloeëpe, mèr de binnekómst woor övvertròffe dur alle kòlleegaas die al versie:rt han, Méélse vastelaovesmeziek han èngezit èn begooste te zinge toe ik binnekwaam.
Umdè wérreke der nie ècht inzaat mòndich, bén ik smiddes mèr ens alle filliesietaasies óp WhatsApp, Facebook èn Instagram gòn beantwoorde. Óngluuëflek woeveul mènse èn òw dingke èn de moe:te neeme um ’n paar weurt óp te sjrie:ve. Ók die van de Poost weete óndertusse wòr de prins wónt, want die mach iedderen dach ’n èntal sjòn karte kómme brénge!
Bedangt vur al òllie filliesietaasies, kartjes, kedoos èn woe géllie óns hébbe óntvange. Um di gevuu:l vaast te haawe, kie:k ik utj nòr min uurste òffiesjeele ivvenemènt; de Liedjesaovend. Benééjt wa de néjje sjlaager van 2024 wért.
'ne Kick-start mi goejje meziek, veuróp in ’t Kieveloeëteriek
Prins Jarno I